सिमराका उद्योगीलाई नेपालले भने,‘म कार्यकारी हैन, पहल गरुँला’

२५ चैत, सिमरा । नेकपा एकिकृत समाजवादीका अध्यक्ष माधवकुमार नेपालले सिमराका उद्योग व्यवसायीलाई आफु कार्यकारी पदमा नभए पनि समस्या हल गर्न सहयोग गर्ने आश्वासन दिएका छन् ।

व्यवसायीले जितपुर सिमरा उपमहानगरपालिकाले गत असोजदेखि लागू गरेको एकीकृत सम्पत्ति करको विषय उठाएका थिए ।

शुक्रबार सिमरा आइपुगेका अध्यक्ष नेपाललाई उद्योगी व्यवसायीले कर बढेको गुनासो पोखेपछि नेपालले यस्तो आश्वासन दिएका हुन् ।

सिमरामा नेपालसँग उद्योगी व्यवसायीहरुले जितपुर सिमरा उपमहानगरले व्यवसायी र आम नगरवासीको ढाड सेक्ने गरी हजार प्रतिशतले सम्पत्ति करमा वृद्धि गरेको गुनासो सुनाए ।

संघीय सरकार मार्फत हस्तक्षेप गरेर कर हटाउन उनीहरुले नेता नेपालसँग आग्रहसमेत गरे । उपमहानगरले बढाएको करको दरलाई संघीय सरकारमार्फत हस्तक्षेप गरेर हटाउन पहल गरिदिन जितपुर सिमरा नगर उद्योग वाणिज्य संघका अध्यक्ष सञ्जय साहले नेता नेपालसँग आग्रह गरेका छन् ।

व्यवसायीसँगको भेटमा नेपालले आफू कार्यकारी अधिकारमा नभए पनि व्यवसायीको हित हुने गरी निर्णय गर्न पहल गरिदिने प्रतिवद्धता जनाएका थिए ।