प्रधामन्त्रीसँग तत्काल एलसी खोल्न व्यवसायीको आग्रह

२६ चैत काठमाडौं । व्यवसायीहरुले सवारी साधानका कच्चा पदार्थ आयातका लागि एलसीमा लगाइएको रोक खुलाउन प्रधामन्त्री शेरबहादुर देउवासँग माग गरेका छन् ।

नाडा अटोमोबाइल्स एसोसियसन अफ नेपालले सवारी तथा ढुवानीका साधनलगायत त्यसमा प्रयोग हुने स्पेयर पार्टसको आयातका लागि प्रतितपत्र (एलसी) खोल्न देउवासँग माग गरेको हो ।

नाडाका अध्यक्ष ध्रुव थापा नेतृत्वको चार सदस्यीय प्रतिनिधिमण्डलले प्रधानमन्त्री शेरवहादुर देउवासँग भेट गर्दै एलसी खोल्न माग गरेको नाडाका महासचिव सुरेन्द्रकुमार उप्रेतीले बताए ।

भेटमा नाडाका प्रतिनिधिले व्यवसायीहरुलाई कुनै समय नै नदिई अप्रत्याशित रुपमा एलसी बन्द गरिएको भन्दै गुनासो गर्दै एलसी खोल्नेबारे तत्काल सम्बोधन गरिदिन प्रधानमन्त्री देउवासमक्ष माग गरेका थिए ।

नाडा प्रतिनिधिमण्डलले अटोमोबाइल्स क्षेत्रमा २ खर्बभन्दा बढी लगानी रहेको र हरेक वर्ष एक खर्व ५० अर्बभन्दा बढी राजस्वमा योगदान पु¥याउँदै आएको जानकारी गराएको थियो । त्यस्तै देशको प्रत्यक्ष रोजगारीमा ५० हजारभन्दा बढीलाई अवसर दिदै आएको अटोमोबाइल क्षेत्रलाई सरकारले बेवास्ता गर्न नहुने उनीहरुको भनाइ थियो ।

अटोमोबाइल क्षेत्रको ठूलो योगदानका वावजुद पनि सरकारका नीतिहरु सधैं अटोमोबाइल व्यवसायीहरुलाई निरुत्साहित गर्ने खालको हुने गरेको गुनासो गरेका व्यवसायीलाई देउवाले नाडाका सुझावहरुलाई सकारात्मक रुपमा लिँदै सवारीसाधन आयात गर्न प्रतितपत्र खोल्नेबारे आवश्यक जानकारी लिई सम्बन्धित निकायमा निर्देशन दिने आश्वासन दिएका थिए ।