एमालेमाथि जाइलाग्न बनेको गठबन्धन चुनाव अघिनै टुक्रिएर चोइटामा परिणत हुन्छः ओली

२६ चैत, पर्वत ।  नेकपा एमालेका अध्यक्ष केपी शर्मा ओलीले सत्ता गठबन्धन चुनावसम्म टिक्नै नसक्ने र टिके पनि एमालेले नराम्रो गरी हराइदिने बताएका छन् । ओलीले उम्मेदवार चयन प्रक्रिया पुरा नहुँदै गठबन्धनमा फुट आउने दावी गरेका छन् ।

नेकपा एमाले पर्वतले स्थानीय तहको चुनावलाई लक्षित गरी आयोजना गरेको सभालाई सम्बोधन गर्दै एमालेले देशको विकास गरेको देखेर अत्तालिएकाहरुलाई अबको निर्वाचनमा फेरि एकल दुईतिहाइ बहुमत ल्याएर देखाइदिने चेतावनी दिए ।

अध्यक्ष ओलीले विकासको पहिलो लहर ल्याउने स्थानीय सरकार नै भएकाले पहिला स्थानीय सरकारमा एमालेलाई जिताउन पनि मतदातालाई आग्रह गरे । एमालेतिर जनताको लहर आएको भन्दै उनले पाँच दलीय गठबन्धनका टुक्राहरु र चोइटाहरु चुनाव अगाडी देखिने बताए ।

आफुले धेरै पटक अरिंगालको कुरा उठाएको र त्यसमा आलोचना भएको स्मरण गर्दै भने,‘ चुनावका बेला अरिंगाल के हो भन्ने थाहा हुन्छ । गठबन्धनलाई एमालेमाथि जाइलाग्न नहुने सन्देश दिनुपर्छ । मैले केही समयअघि नेकपा एमालेलाई टोक्न नखोज । अरिंगाले त गोलो चलायो भने टोक्छ भने एमालेलाई चलायो भने त्यसको दुर्गति हुन्छ भनेको थिएँ । निकै अरिंगालको कुरा गरे । अब थाहा हुन्छ अरिंगाल भनेको के हो । चुनावका बेला थाहा हुन्छ ।’