देशको अर्थतन्त्र र गभर्नरका विषयमा पार्टीको धारणा सार्वजनिक गर्न एमालेले पत्रकार सम्मेलन गर्दै

२७ चैत, काठमाडौं ।  नेकपा एमालेले मुलुकको आर्थिक अवस्थाबारे पार्टीको धारणा सार्वजनिक गर्ने भएको छ । आइतबार एमालेबाट अर्थमन्त्री बनेका र केही अर्थविद्हरुलाई राखेर धारणा सार्वजनिक गर्न लागेको हो ।

ललितपुरको कुपण्डोलस्थित होटल हिमालयमा दिउँसो साढे १२ बजे पत्रकार सम्मेलन आयोजना गरी एमालेले पार्टीको धारणा सार्वजनिक गर्न लागेको हो ।

पत्रकार सम्मेलनबाट अर्थतन्त्र संकटमा परेको बेला गभर्नर महाप्रसाद अधिकारी निलम्बित भएको विषयमा पनि औपचारिक धारणा दिने तयारी गरिएको छ ।

पत्रकार सम्मेलनमा एमालेबाट विगतमा अर्थमन्त्री बनेका विष्णु पौडेल, सुरेन्द्र पाण्डे र डा. युवराज खतिवडाले देशको वर्तमान अर्थव्यवस्थाबारे ब्रिफिङ गर्नेछन् ।

कार्यक्रममा राष्ट्रिय योजना आयोगका पूर्वउपाध्यक्षहरु डा. दिनेशचन्द्र देवकोटा र पुष्प कँडेलको पनि सहभागीता रहने बताइएको छ ।