सशस्त्रका आईजीपी शैलेन्द्र खनाल पदावधि सकिएर आज घर जाँदै

२८  चैत, काठमाडौं । सशस्त्र प्रहरी महानिरीक्षक (आईजीपी) शैलेन्द्र खनाल आज चार वर्षे कार्यकाल पुरा गरी घर फर्कदै छन् ।

उनी सेवा अवधी सकेर घर फर्कन लाग्दा समेत सरकराले नयाँ आईजीपी बनाएको छैन । आज पुष्पराम केसी र रामशरण पौडेलमध्ये एक जना आईजीपी बन्दैछन् ।

खनालले आईजीपीको चार वर्षे पदावधिका कारण अवकाश पाउन लागेका हुन् । सशस्त्र प्रहरीको इतिहासमा ४ वर्षे पदावधि पूरा गर्ने उनी पहिलो आईजीपी हुन् । सशस्त्रमा सेवा अवधि, पदावधि र उमेर हदमध्ये एक कारणले अवकाश पाउने व्यवस्था छ ।

डीआईजी र एआईजीको पदावधि ४ वर्ष भएपनि सरकारले चाहेमा दुवै दर्जामा एक वर्ष पदावधि थप गर्न सक्ने कानुनी व्यवस्था रहेको छ ।

एआइजीहरु पुष्पराम केसी र रामशरण पौडेल दुवैको एक वर्ष थप भएको हो । पदावधि थप नभएको भए उनीहरूको गत वर्ष नै अवकाशमा गइसक्थे ।

वर्तमान आईजीपी खनालसहित एआईजीद्वय केसी र पौडेलले २०४९ बैशाख १९ गते नेपाल प्रहरीको निरीक्षकबाट सेवा सुरु गरेका थिए । २०५८ सालमा एपीएफ स्थापना भएपछि खनाल, केसी र पौडेल एपीएफमा गएका थिए ।

डीआईजीमा बढुवा हुँदा खनाल पहिलो, केसी दोस्रो र पौडेल तेस्रो नम्बरमा थिए । एआईजीमा एक्लो बढुवा भएपछि खनाल आईजीपी बन्ने पक्का भएको थियो ।

सशस्त्र प्रहरीमा आईजीपी हुन एआईजीबाट मात्र बढुवा गर्न सकिने व्यवस्था छ । नेपाल प्रहरीमा भने डीआईजीबाट पनि एआईजी बनाउन सकिने व्यवस्था छ।

सशस्त्र प्रहरीमा हाल प्राविधिकबाहेक एआईजीको दरबन्दी दुईवटा मात्र भएकाले सरकारले केसी र पौडेलमध्ये एकलाई एआईजीमा बढुवा गरेर वैशाख १९ पछि बन्ने अर्को आईजीपीका लागि एआईजीको ठाउँ बनाउनुपर्ने अवस्था छ ।