झापामा ट्रकले ठक्कर दिँदा मोटरसाइकल चालकको मृत्यु

२८ चैत झापा । झापामा गए राति ट्रकले ठक्कर दिँदा मोटरसाइकल चालकको मृत्यु भएको छ। बिर्तामोडस्थित रामचोकमा ट्रकको ठक्करबाट मोटरसाइकल चालक बिर्तामोड २ बेलडाँगीका ३२ वर्षीय संगम बजगाईंको मृत्यु भएको प्रहरीले जनाएको छ।

पूर्वतर्फ जाँदै गरेको ना ६ ख ६४५६ नम्बरको ट्रकले विपरीत दिशाबाट आइरहेको बा १५ प ८२०२ नम्बरको बुलेट मोटरसाइकललाई ठक्कर दिँदा मोटरसाइकल चालक बजगाईं घाइते भएका थिए ।

उनको बिएण्डसी अस्पतालमा उपचारका क्रममा राति मृत्यु भएको प्रहरीले जनाएको छ। ट्रक र ट्रक चालक नियन्त्रणमा रहेको इलाका प्रहरी कार्यालय बिर्तामोडले जनाएको छ ।