आयोगले कांग्रेस नेता शशांक कोइरालासँग माग्यो निर्वाचन खर्चको प्रष्ट जवाफ

२८ चैत, काठमाडौं । नेपाली कांग्रेसका नेता डा.शशांक कोइरालाले प्रतिनिधि सभाको अघिल्लो निर्वाचनमा ६ करोड रुपैयाँ खर्च भएको अभिव्यक्ति दिएपछि निर्वाचन आयोगले उनीसँग जवाफ मागेको छ । कोइरालाले गरेको दाबी र निर्वाचन आयोगमा रहेको विवरणमा फरक आएपछि था प्रष्टताको आवश्यकता परेको भन्दै जवाफ माग गरेको हो ।

विभिन्न सञ्चार माध्यम मार्फत कोइरालाले दिएको अभिव्यक्ति अनुसार ६ करोड रुपैयाँ खर्च भएको भन्ने भनाइप्रति निर्वाचन आयोगको गम्भिर ध्यानाकर्षण भएको जनाएको छ । निर्वाचन आयोगका प्रवक्ता शालिग्राम शर्मा पौडेलले सोमबार आयोजित पत्रकार सम्मेलनमा त्यस विषयमा के कसो भएको हो सात दिन भित्र आयोगमा जवाफ पठाउन आयोगले ध्यानाकर्षण गराएको जानकारी दिए ।

केही दिनअघि कोइरालाले २०७४ सालको प्रतिनिधि सभा निर्वाचनमा ६ करोड रुपैयाँ खर्च भएको बताएका थिए । त्यसपछि उनी विवादमा तानिएका थिए । २०७४ सालमा सम्पन्न प्रतिनिधिसभा सदस्य निर्वाचनमा आयोगले एक जना उम्मेदवारलाई २५ लाख रुपैयाँसम्म खर्च गर्न पाउने अधिकार दिएको थियो ।

उक्त प्रतिनिधि सभा निर्वाचनमा कोइराला नवलपरासी बर्दघाट सुस्ता पूर्वको प्रतिनिधि सभा सदस्य निर्वाचन क्षेत्र नं. १ बाट निर्वाचित भएका थिए । निर्वाचित भएपछि उनले आयोगमा पेश गरेको आफ्नो निर्वाचन खर्चको विवरणमा २१ लाख ७५ हजार रुपैयाँ पेश गरेको प्रवक्ता पौडेलले जनाए ।