आयोगले सोध्यो नेकपा एसलाई स्पष्टीकरण

२८ चैत, काठमाडौं । नेकपा एकिकृत समाजवादी पार्टीलाई निर्वाचन आचारसंहिता उल्लंघन गरेको आरोपमा निर्वाचन आयोगले  स्पष्टीकरण सोधेको छ ।

शनिबार भृकुटिमण्डपमा आयोजित कार्यक्रममा एकिकृत समाजवादीले आचारसंहिता उल्लंघन गरेको उजुरी आयोगमा परेपछि ३ दिनभित्र जवाफ दिन भन्दै आयोगले पत्र काटेको प्रवक्ता एवं सहसचिव शालिग्राम शर्मा पौडेलले जानकारी दिए ।

आयोगको पत्र काट्दै प्रमाणसहित चित्तबुझ्दो जवाफ पेस गर्न भनेको छ । यसैबीच, स्थानीय तह निर्वाचनका लागि हालसम्म २८ जिल्लाका लागि आवश्यक पर्ने ४५ लाख २२ हजार मतपत्र छपाइ कार्य सम्पन्‍न भएको प्रवक्ता पौडेलले जानकारी दिए ।

यस्तै, निर्वाचनको मिति घोषणा भएपछि आचारसंहिता लागू हुनुअघिसम्म २३ हजार ८ सय मतदाता थपिएको आयोगले जनाएको छ ।