महानगरमा शीर्ष नेतृत्वलाई दवाव, पोखरा कांग्रेस पनि काठमाडौं आउँदै

२९ चैत, काठमाडौं । स्थानीय तह निर्वाचनमा महानगरका उम्मेदवार छानोट गर्ने जिम्मा केन्द्रमा राखिएपछि गठबन्धनमा भागबण्डा मिलाएर उम्मेदवार छनोट गर्न शीर्ष नेतृत्वमा दवाव परेको छ ।

काठमाडौं,ललितपुर,भक्तपुर, भरतपुर, पोखरा, विराटनगर लगायतका सबै जासोमा गठबन्धनले भागबण्डा मिलाउनुपर्नेछ । सरकारको नृतृत्वसमेत गरिरहेको नेपाली कांग्रेस महानगर मिलाउने विषयमा बडी तनामा देखिएको छ ।
स्थानीय निर्वाचनमा आवश्यकता अनुसार गठबन्धन गर्ने नेपाली कांग्रेसले केन्द्रमा निर्णय गरिसकेको छ । उक्त निर्णय पश्चात गठबन्धनका माओवादी र समाजवादी दुवैले पोखरा महानगरपालिकामा आ–आफ्नो दाबी गरेका छ्न् । समाजवादीको पहिलो रोजाइ नै पोखरा हो ।

भूगोलको हिसाबले सबैभन्दा ठूलो पोखरा महानगरपालिका पर्यटनको राजधानी पनि मानिन्छ । अघिल्लो निर्वाचनमा १३ हजार ७०२ मतान्तरले एमालेका मानबहादुर जिसीले कांग्रेसका रामजी कुँवरलाई पराजित गरेका थिए ।

अहिले पोखरामा ३९ हजार मतदाता थपिएका छन् ।अघिल्लो निर्वाचनमा कांग्रेसले प्रमुखमा ४६ हजार ४१६ मत ल्याएको थियो । यसपटक पोखरामा ३९ हजार ६४५ मतदाता थपिएका छन् । नयाँ मतदातामा १५ हजार मतदाता आफ्नो रहेको दाबी कांग्रेसको छ ।

सोही कारण देखाउँदै गठबन्धनको सबैभन्दा ठूलो दलको हिसाबमा पोखरा कांग्रेसले छोड्न नहुने दबाब दिन कास्की कांगेस नेतृत्व काठमाडौं आउँदैछ ।

कांग्रेस पोखरा महानगर सचिव गणेश बहादुर थापाका अनुसार कांग्रेस कास्की सभापति किशोरदत्त बरालको समन्वयमा प्रदेश मन्त्री विन्दुकुमार थापासहित वरिष्ठ नेता, कास्की जिल्ला कार्यसमिति, क्षेत्रीय र प्रदेश सभापति, महानगर पदाधिकारी, कांग्रेसको तर्फबाट पोखरा महानगरका लागि मेयर तथा उपमेयरका आकांक्षीलगायत व्यक्तिहरु काठमाडौं आउँदैछन् ।

उनीहरुले बुधबार नेपाली कांग्रेसका सभापति शेरबहादुर देउवा, उपसभापति, महामन्त्रीलगायत शीर्ष नेताहरुलाई भेटेर पोखरा महानगरपालिका कुनै हालतमा नछोड्न दबाब दिने कार्यक्रम रहेको थापाले बताए ।

अहिले कांग्रेसमा दर्जनबढी आकांक्षी पोखराको नेतृत्व लिन तयार छ्न् । उनीहरु आफ्नो पक्षमा लविङ् गरिरहेको छन् । यता गठबन्धन गर्ने केन्द्रको निर्णयले कांग्रेसले नै नेतृत्व नपाउने हो कि भन्ने अन्योलताबीच सबै आकांक्षीसहितको टोली राजधानी जाने र दबाब दिने कार्यक्रम छ ।

कांग्रेस शीर्ष नेतृत्वलाई भेटेर कांग्रेस नेतृत्वमा चुनावमा जाँदा गठबन्धनको जीत सुनिश्चित हुने जानकारी गराइने मन्त्री विन्दुकुमार थापाले बताए । यता, एमालेले मंगलबार नै महानगरको उमेदवार सिफारिस गर्नेछ ।