जथाभावी जग्गा हडप्ने भूमाफियालाई ठेगान लगाउनुपर्छः प्रधानमन्त्री देउवा

२९ चैत, काठमाडौं ।  प्रधानमन्त्री शेरबहादुर देउवाले भूमाफियाहरूले काठमाडौंका ठाउँठाउँमा जथाभावी जग्गा हडप्दै गएकाले त्यसमा सम्बन्धित निकायले कडाइ गर्न आवश्यक भएको बताएको छ ।

प्रधानमन्त्री देउवाले भूमाफियाहरुले हडपेका जग्गाहरुको फेहरिस्त तयार गरी के कति कारणले उनीहरुमाथि कारवाही भएन त्यसको विवरण तयार पार्न पनि निर्देशन दिएका छन् ।

मंगलबार काठमाडौंमा आयोजित ’राष्ट्रिय सहरी नीति, सहरी विकास ऐन र युटिलिटी करिडोर ऐन तर्जुमासम्बन्धी परामर्श गोष्ठी’ लाई सम्बोधन गर्दै प्रधानमन्त्री देउवाले काठमाडौंमा खाली ठाउँ नै नहुने गरी जग्गा हडपिएको तर, सरकारका सम्बन्धित निकायनै मौन बसेको बताए ।

उनले भने,‘भूमाफियाहरूले जथाभावी ठाउँठाउँमा जग्गा हडप्दै गएका छन् । कसरी गरेका छन् त्यो पनि पनि थाहा छैन । किन हडपी रहेका छन् त्यसको रिपोर्ट पनि छैन । भूमि हेर्ने मन्त्रालय छ । विभाग छन् उनीहरुले यसमा ककडाई गर्नुपर्छ । तलबाट सकिएन भने माथि आउनुपर्यो । भोलि काठमाडौंमा खाली ठाउँ नै हुने छैन । यसमा पनि ध्यान दिनुस ।’

खाली ठाउँ सबै आफ्नो नाममा गरेका खबरहरु आइरहेको भन्दै देउवाले सहरी विकास मन्त्रालय, गृह मन्त्रालयले सबै मिलेर काठमाडौंका खाली ठाउँहरूलाई जोगाउने र खाली गराउने कामलाई तिब्रता दिनुपर्ने बताए । उनले निर्वाचनसम्बन्धी आचारसंहिता लागू भइसकेकाले त्यसलाई ध्यान दिन पनि सबैलाई आग्रह गरे ।