संघीय सरकारलाई मधेसका प्रहरी चौकी खाली गर्न मन्त्री साहको चेतावनी

२९ चैत, जनकपुर । प्रदेश प्रहरी भनार्मा चासो नदिएको भन्दै मधेस प्रदेशका आन्तरिक मामिलामन्त्री भरतप्रसाद साहले संघीय सरकारलाई मधेसका प्रहरी चौकी खाली गर्न चेतावनी दिएका छन् । निर्वाचनको समय आइसक्दा समेत संघीय सरकारले प्रहरी भर्ना गर्न सहमति नदिएको उनको साहको छ ।

मंगलबार प्रदेशसभामा पेस गरिएको प्रदेश प्रहरी संकल्प प्रस्तावमाथि धारणा राख्ने क्रममा मन्त्री साहले संघीय सरकारले सहमति नदिए पनि प्रदेश प्रहरी भर्ना प्रक्रिया अगाडि बढाउने बताए ।

उनले प्रदेश प्रहरी भर्नाका लागि मन्त्रिपरिषद्को बैठकमा ठाडो प्रस्ताव लग्ने दाबी गर्दै अब पनि संघीय सरकारले ध्यान नदिए आफैले प्रहरी भर्ना खोल्ने बताए । यसका लागि प्रदेशसभासँग निर्देशन माग्दै साहले भने,‘म ठाडो प्रस्ताव मन्त्रिपरिषदमा लग्छु । देश द्वन्द्वमा जान्छ भने जाओस् । म प्रहरी भर्ना निकाल्छु–निकाल्छु ।’

संघीय सरकारले प्रहरी कर्मचारी समायोजन ऐन बनाइसके पनि प्रहरी समायोजन नगर्दा प्रदेश सरकारहरूले आफ्नो प्रहरी गठन र भर्ना खोल्न सकेको छैनन् । लामो समयदेखि प्रहरी समायोजन थाँती रहँदा मधेस प्रदेश सरकारले सर्वोच्च अदालतमा प्रहरी समायोजन गर्न रिटसमेत हालेको छ ।

प्रदेशसभाको बैठकले प्रदेश प्रहरीसम्बन्धी संकल्प प्रस्ताव सर्वसम्मतले पारित गरेको छ । उनले भने ‘मैले पार्टी अध्यक्ष प्रचण्डजीलाई पनि भनेको छु, संविधानको अधिकार दिइएन भने विद्रोह गर्छु । पार्टीले साथ दिनुपर्छ ।’