सत्ता भागबण्डाः कांग्रेसलाई विराटनगर, माओवादीलाई भरतपुरमा सहमति !

२९ चैत, काठमाडौं । सत्ता गठबन्धनको नेतृत्व गरेको नेपाली कांग्रेसले भरतपुर महानगरपालिका पुनः माओवादीलाई छाड्न तयार भएको छ । ६ वटा महानगर भागबण्डामा सहमति जुटिनसकेको भएतापनि भरतपुर महानगरपालिका भने माओवादीलाई छाड्न कांग्रेस तयार भएको स्रोतले जनाएको छ ।

शीर्ष तहमा चार दलबीच महानगरको भागवण्डाबारे अनौपचारिक सहमति जुटेको तर बाहिर भनिनसकेको पनि बताइएको छ । सत्तारुढ पाँच दलमध्ये कांग्रेसले तीनवटा महानगर, माओवादी केन्द्र, एकीकृत समाजवादी र जसपाले एक/एकवटा महानगरको नेतृत्व लिनुपर्नेमा छलफल भइरहेको स्रोतले जनाएको छ ।

माओवादीको दाबी पहिलादेखि नै भरतपुर महानगरमा रहेको छ । त्यसमा कांग्रेसका जिल्लास्तरीय नेताहरूको दाबी र लविङ पनि चर्कै देखिएको छ । कांग्रेस सभापति तथा प्रधानमन्त्री शेरबहादुर देउवा भरतपुर महानगर माओवादीलाई छोड्न अनौपचारिक रूपमा सहमत भइसकेका छन् । भरतपुरबाट धेरै नेताहरु आकांक्षी रहेका छन् । तर कांग्रेसले जसलाई दिएपनि निर्वाचन जित्ने भएकाले त्यहाँ नछाड्न स्थानीय नेताहरुले सभापति शेरबहादुर देउवालाई लगातार दबाब दिइरहेका छन् ।

भरतपुर महानगरमा दाबी गर्नेहरूलाई सभापतिका प्रत्यासी डा.शेखर कोइरालाले उचालेको बुझाइमा देउवा देखिएका छन् । कांग्रेसले विराटनगर, काठमाडौं र ललितपुर महानगर लिने सम्भावना बढेको छ । जसपाले वीरगञ्ज पाउने पक्कापक्कीजस्तै छ । गठबन्धन कायम नरहँदा पनि जसपाको बलियो उपस्थिति रहेको बीरगञ्जमा गठबन्धन भएमा झनै सजिलो हुने देखिएको छ । माओवादीले भरतपुर महानगर पाउने अवस्थामा एकीकृत समाजवादीले भने पोखरा महानगर पाउने सम्भावना बलियो छ । तर पोखरामा पनि कांग्रेसका नेताहरुले लविङ गरिरहेका छन् । उनीहरु केन्द्रमा डेलिगेशन आएका छन् ।

कांग्रेसभित्र कतिपय नेताहरूले एकीकृत समाजवादीलाई काठमाडौंमा उपमेयर दिएर पोखराको मेयर लिनुपर्ने लविङ पनि गरेको भएपनि मानिरहेका छैनन । तर, एकीकृत समाजवादी एउटा महानगर नछोड्ने अडानमा छ । एमालेले जितेका महानगरमध्ये आधा आफूले पाउनुपर्ने अडानमा एकीकृत समाजवादी छ । कांग्रेसले काठमाडौं महानगर नछोड्ने भएकै कारण पोखरा समाजवादीको भागमा पर्ने सम्भावना देखिएको हो ।

एक नेताले बताएअनुसार नगरपालिका र गाउँपालिकामा हुने तालमेलको विषय टुंगो नलागेका कारण मात्रै अन्तिम मोडालिटी नआएको हो । सत्ता गठबन्धनका नेताहरूले आज तालमेलको मोडालिटी टुंगा लगाउने बताइरहेका छन् । माओवादी केन्द्रले भरतपुर नछाडेपछि कांग्रेसले देशभर गठबन्धन भत्कनेसक्ने भन्दै प्रचण्डको भागमा भरतपुर महानगरपालिका पारेको हो ।

पोखरा महानगरपालिका र काठमाडौं महानगरपालिकाको भागबन्डाका विषयमा आज औपचारिक छलफल हुदैछ । यी दुई महानगरपालिका अघिल्लो निवार्चनमा नेकपा एमालेले जितेको थियो ।