कांग्रेस केन्द्रीय कार्यसम्पादन समितिको बैठक बस्दै, कोइराला पक्षका छुट्टै एजेण्डा

३० चैत, काठमाडौं । स्थानीय तहको निर्वाचन, उम्मेदवार चयन र पार्टीको चुनावी घोषणापत्रका विषयमा छलफल गर्न नेपाली कांग्रेस केन्द्रीय कार्यसम्पादन समितिको बैठक बुधबार (आज) बस्दैछ ।

पार्टी केन्द्रीय कार्यालय ललितपुरमा दिउसो बस्ने बैठकले स्थानीय तह निर्वाचनको घोषणापत्रलाई अन्तिम रुप दिइने बताइएको छ । बैठकमा सत्ता गठबन्धन दलबीच तालमेलमा स्थानीय तशबाट आएका दवाव र समस्याका विषयमा पनि छलफल हुनेछ ।

आजको बैठकमा संस्थापनइतर समूले सरकारका कामकारवाहीका विषयमा पनि प्रश्न उठाउने बताइएको छ । संस्थापनइतर समूहको नेतृत्व गरिरहेको डा. शेखर कोइराला पक्षका नेताहरुले गभर्नरमाथिको कारवाही र अर्थमन्त्री परिवर्तनको विषयलाई पनि उठाउने भएका छन् ।

बैठकमा जानुअघि कोइराला पक्षका नेताहरुले सामुहिक छलफल गरी बैठकमा कसरी प्रस्तुत हुने भन्ने विषयहरु तयार गर्ने भएका छन् । बुधबार विहान कोइराला पक्षका नेताहरुले आजको बैठकमा प्रस्तुत गर्ने एजेण्डा तयार गर्ने बताइएको छ ।

स्थानीय तहको निर्वाचनमा स्थानीय आवश्यकता र औचित्यताका आधारमा मात्रै तालमेल गर्नुपर्ने पक्षमा रहँदै आएका कोइरालाले यसअघिनै पार्टी सभापति एवं प्रधानमन्त्री शेरबहादुर देउवासँग विभिन्न प्रश्नहरु एठाउँदै आएका छन् ।

स्थानीय तह निर्वाचनमा खासगरी महानगरका विषयमा जिल्ला तहबाट आएका असन्तुष्टी र डेलिकेशनलाई पनि कोइराला समूहले महत्वका साथ उठाउने भएको छ । गठबन्धन गर्दा महत्वपूर्ण महानगरमा कांग्रेस नेतृत्व अडान राख्न नसकेको र उम्मेदवार चयनमा केन्द्रले हस्तक्षेप गरेको कोइराला पक्षको भनाई छ ।

बैठकमा महामन्त्री गगनकुमार थापा संयोजक रहेको चुनावी घोषणापत्र तयारी समितिले तयार पारेको सुझाव सहितको प्रतिवदेन पेश गर्ने छ । चुनावी घोषणपत्रका लागि समितिले विभिन्न पक्षसँग सुझाव पनि लिइरहेको छ ।

आजको बैठकमा केन्द्रीय कार्यसम्पादन समितिका पदाधिकारी तथा सदस्यहरुलाई अनिवार्य बैठकमा उपस्थित हुन आग्रह गरिएको पार्टीका मुख्य सचिव कृष्णप्रसाद पौडेलले जानकारी दिएका छन् ।