शाहको नेपाली जनता दल र नव नेपाल डेमोक्रेटिक पार्टीबीच एकता

 ३० चैत, काठमाडौं । स्थानीय तह निर्वाचन नजिकिँदै गएको बेला नेपाली जनता दल र नव नेपाल डेमोक्रेटिक पार्टीबीच एकीकरण भएको छ । दुई पार्टीले काठमाडौंमा एक कार्यक्रम आयोजना गरी एकीकरणको घोषणा गरेका हुन् ।

कार्यक्रममा नेपाली जनता दलका अध्यक्ष हरिचरण शाह र नव नेपाल डेमोक्रेटिक पार्टीका अध्यक्ष अनुप पहाडीले पार्टी एकीकरण पत्रमा हस्ताक्षर गरेर पार्टी एकता भएको घोषणा गरेका हुन् ।

दुवै पार्टीले विभिन्न सम्वादपछि एकताको अवस्थामा पुगेको जनाएका छन् । दुवै पार्टीबीच राष्ट्रिय मुद्दा र विकासबारे समानता रहेको जनाउँदै हरिचरण शाह राष्ट्रिय अध्यक्ष र अनुप पहाडी संघीय परिषद अध्यक्ष रहने गरि पार्टी एकीकरण जनाइएको छ ।

जनयुद्ध जनआन्दोलन लगायतबाट प्राप्त गणतन्त्रको उपलब्धिकाे रक्षा गर्दै समाजवादी क्रान्तिको यात्रामा स्पष्ट र दृढमत रहेर अगाडी जाने सहमतिअनुसार दुई पार्टीबीच एकता भएको हो । संविधानमा थ्रेसहोल्डको व्यवस्था भएपछि सानादलहरु अस्तित्वमा आउन सकेका छैनन् ।

पूर्वमन्त्री समेत रहेका शाहले एकीकरणबाट आगामी दिनमा देशलाई समानता न्यायको बाटोमा डोर्याउने कार्यलाइ अगाडी लान सहज भएको बताए ।