निर्वाचन आचारसंहिता विपरित माओवादीको चुनावी पोस्टरमा विद्युत प्राधिकरणका कुलमान हिरो

३० चैत, काठमाडौं । नेकपा माओवादी केन्द्रले निर्वाचन आचारसंहिता विपरित स्थानीय तहको चुनावी प्रचार सामाग्री ‘पोस्टर’मा नेपाल विद्युत प्राधिकरणका कार्यकारी निर्देशक कुलमा घिसिङको तस्वीर छापेर प्रचारका लागि सार्वजनिक गरेको छ ।

निर्वाचन आयोगले जारी गरेको निर्वाचन आचासंहितामा कुनै पनि सरकारी कर्मचारीले चुनाव प्रचार अभियानमा लाग्न नपाइने र लगेको पाइए कानूनअनुसार कारवाही हुने उल्लेख छ । तर, सरकारमा सामेल माओवादीले प्राधिकरणका कार्यकारी निर्देशक घिसिङको तस्बिर राखेर चुनावी सामग्री बनाएको छ ।

निर्वाचन आचारसंहिता २०७८ मा भने सरकारी कर्मचारीले कुनै पनि राजनीतिक दल वा उम्मेदवारको पक्ष वा विपक्षमा प्रचारप्रसारमा संलग्न हुन रोक लगाइएको छ ।

कार्यकारी निर्देशक घिसिङले भने आफ्नो सहमतिबिना तस्बिर राखिएको प्रतिक्रिया दिएका छन् । उनले प्रस्ताव आएपनि मेरो तस्बिर नराख्नु भनेको थिएँ तर, मेरो सहमतिविपरीत तस्बिर राखिएको बताएका छन् ।

माओवादी अध्यक्ष पुष्पकमल दाहाल ’प्रचण्ड’को आधिकारिक फेसबुक पेजबाट सार्वजनिक भएको चुनावी पोष्टरमा प्राधिकरणका कार्यकारी निर्देशक घिसिङको तस्बिर राखेर ‘अध्याँरोबाट उज्यालोतर्फ’ उल्लेख गर्दै चुनावी पोष्टर सार्वजनिक गरेको छ । उक्त पोस्टरमा माओवादीका अध्यक्ष प्रचण्ड र नेता जनार्दन शर्मा पनि रहेका छन् ।

’अँध्यारोबाट उज्यालोको यात्रा’ लेखिएको उक्त पोस्टरमार्फत माओवादीले लोडसेडिङ अन्त्यलाई आफ्नो ठूलो सफलताका रूपमा चित्रण गरेको छ । साथै अब निःशुल्क बिजुलीको अभियानलाई अगाडि बढाउनेसमेत माओवादीले जनाएको छ ।