निर्वाचन सार्ने षडयन्त्रबिरुद्ध आयोग र अदालत अडिक नभए देश दुर्घटनामा जान्छः ओली

३० चैत, काठमाडौं ।  नेकपा एमालेका अध्यक्ष केपी शर्मा ओलीले सत्ता गठबन्धन कुनै पनि बहानामा निर्वाचन सार्ने षडयन्त्रमा लागेकाले अयोग र अदालत सचेत भएर बस्नुपर्ने बताएका छन् । उनले अहिलेको निर्वाचन सारिए देश फेरी ठूलो दुर्घटनामा जान सक्ने खतरा पनि औल्याएका छन् ।

बुधबार मोरङको विराटनगरमा आयोजित सभालाई सम्बोधन गर्ने क्रममा ओलीले चुनाव सार्न षड्यन्त्र भइरहेको र यो षडयन्त्रप्रति सवोच्च अदालत र निर्वाचन आगोग सचेत भएर बस्नुपर्ने बताए । उनले निर्वाचन आयोगले कुनै पनि हालतमा चुनाव सार्ने विषयलाई ध्यानमा राखेर रोक्नुपर्ने भनाई राखे ।

ओलीले फेरि चुनाव सार्न षड्यन्त्र भइरहेको आशंका व्यक्त गर्दै भने, ‘स्थानीय तहको निर्वाचन नगर्न षड्यन्त्र भइरहेको छ । यस्ता षड्यन्त्रलाई अदालतले पनि मान्नु हुँदैन । निर्वाचन आयोगले पनि मान्नु हुँदैन । जसरी हुन्छ चुनाव सम्पन्न गराउनेतिरै लाग्नुपर्छ । निर्वाचन आयोग सबै तयारीको अन्तिम चरणमा पुगेका बेला चुनाव सरियो भने राम्रो हुँदैन ।’

ओलीले २०७८ सालमा गठबन्धनले धेरै षड्यन्त्र गरेको आरोप लगाउँदै यो वर्षलाई गठबन्धनको षड्यन्त्रको वर्षको संज्ञा दिए । सत्तागठबन्धनसँग एकदमै आक्रोसित भएर प्रस्तुत भएका ओलीले देशलाई विकासको गतिबाट रोकेर पछाडि फर्काउन खोजेको बताए ।

गठबन्धनले मुलुकलाई श्रीलंकाको गतितर्फ लैजान खोजे पनि आफूलाई त्यसो हुन नदिने आश्वासन दिए। उनले आगामी वर्ष २०७१ को वर्ष एमालेको विजयीको वर्ष हुनेसमेत दाबी गरे । सत्तारुढ गठबन्धन चुनाव सार्न अध्यादेश नै ल्याउने तयारीमा जुटिरहेको उनको दाबी थियो ।