कांग्रेसको निर्वाचन घोषणापत्रको मस्यौदा परिमार्जनसहित पारित

३० चैत, काठमाडौं । सत्तारुढ नेपाली कांग्रेसले स्थानीय तह निर्वाचन घोषणापत्रको मस्यौदा परिमार्जनसहित पारित गर्ने निर्णय गरेको छ ।

कांग्रेस केन्द्रीय कार्यसम्पादन समितिको बुधबार अपराह्न बसेको बैठकले केन्द्रीय सदस्यहरुको सुझावलाई समेत समावेश गरेर घोषणापत्र मस्यौदालाई पारित गर्ने निर्णय गरेको हो ।

महामन्त्री गगनकुमार थापाले बैठकमा पेस गरेको मस्यौदामा केन्द्रीय सदस्यहरुको समेत सुझावलाई ध्यानमा राखेर पारित गर्ने निर्णय गरिएको प्रवक्ता प्रकाशशरण महतले जानकारी दिए ।

बैठकले बन्दसूचीमा नाम रहेकाहरुलाई हटाउनका लागि निर्वाचन आयोगलाई पत्राचार गर्न पार्टी केन्द्रीय कार्यसमितिलाई अनुमति पनि दिएको छ । बैठकमा सत्तारुढ गठबन्धनबीच चुनावी तालमेलको सहमतिबारे पनि जानकारी गराइएको प्रवक्ता महतले बताए ।

‘कार्यसम्पादन समितिको बैठकमा घोषणापत्रमा भएका मूल विषयवस्तुलाई महामन्त्री गगन थापाले प्रस्तुत गर्नुभयो । त्यस सम्बन्धमा कार्यसम्पादन समितिका साथीहरुले आफ्नो सुझावहरु प्रस्तुत गर्नुभयो । र, त्यो सम्पूर्ण सुझावहरुलाई ध्यानमा राखेर मस्यौदा परिमार्जनसहित घोषणापत्र पारित गर्ने निर्णय गरियो,’ उनले भने ।

समानुपातिकतर्फ बन्दसूचीमा बसेकाहरुले स्थानीय तह निर्वाचनमा उम्मेदवार बन्ने इच्छा देखाएकोले त्यो बन्दसूचीबाट हटाउन निर्वाचन आयोगलाई आग्रह गर्ने निर्णय पनि गरिएको छ । बैठकमा चुनावी गठबन्धनले मंगलबार शीर्ष तहमा भएको छलफल र निर्णयबारे जानकारी गराइएको पनि प्रवक्ता महतले बताए ।