तीनबुँदे कार्यन्वयनसहित सहजीकरण गर्न सकिएपनि चुनावको मिति सार्न सकिदैनः देउवा

३० चैत्र, काठमाडौं ।  प्रधामन्त्री शेरबहादुर देउवाले नेत्रविक्रम चन्द नेतृत्वको नेपाल कम्युनिष्ट पार्टी (नेकपा)सँग यसअघि सरकारले गरेको तीनबुँदे सहमति कार्यन्वयन गर्न र आगामी निर्वाचनमा सहभागिताका लागि सहजीकरण गर्न सरकार तयार रहेपनि निर्वाचनको मिति हेरफेर गर्न भने नसकिने बतएका छन् ।

बुधबार प्रधानमन्त्रीको सरकारी निवास बालुवाटारमा प्रधानमन्त्री देउवा र नेत्रविक्रम चन्द नेतृत्वको नेकपाबीच भएको वार्तामा नेपाल सरकार र नेकपाबीचको तीनबुँदे सहमति कार्यान्वयन र स्थानीय तह निर्वाचनबारेको छलफलमा देउवाले यस्तो बताएका हुन् ।

छलफलमा नेकपाका नेताहरुले आफुहरुले पनि निर्वाचनमा भाग लिन चाहेको तर, तीनबुँदे सहमति कार्यन्वयन र दल दर्ता लगायतका कार्य गर्न चुनाको मिति सानुपर्ने बताएका थिए ।

जवाफमा देउवाले नेकपा निर्वाचनमा भाग लिने भएमा निर्वाचन आयोगमा दल दर्ता, बन्दी नेता कार्यकर्ता रिहाइ, छुट मतदाता नामावली थप गर्न सहजीकरण गरिदिने तर, मिति सार्न नसक्ने बताएका थिए ।

छलफलमा सहभागी एक नेताले दिएको जानकारी अनुसार देउवाले वार्तामा रहेको नेकपालाई निर्वाचनमा सहभागी हुन आग्रह गरेका थिए । नेकपाले वैशाख ३० गतेका लागि निर्धारित स्थानीय तह निर्वाचनलाई प्रयोग गर्ने निर्णय पार्टीले गरेपनि प्रक्रियाका लागी समय नभएको तर्क राखेको थियो ।

सरकारी पक्षले स्थानीय निर्वाचनबाट निर्वाचित हुने जनप्रतिनिधिले स्थानीय गाँउठाँउको विकासमा महत्वपूर्ण भूमिका निर्वाह गर्ने, जनतालाई शक्तिशाली बनाउने विकास र शक्तिको केन्द्र जनताको घर आँगन हुने हुँदा सबै राजनीतिक दलले निर्वाचनमा भाग लिनु उपयुक्त हुने भन्दै नेकपालाई निर्वाचनमा सहभागी हुन आग्रह गरेको थियो ।

नेकपाका तर्फबाट वार्तामा सहभागी नेताहरूले आफूहरू सरकारसँग भएको तीनबुँदे सहमति कार्यान्वयन भएमा निर्वाचनमा सहभागी हुन आफूहरू तयार रहेको बताएका थिए । तर, यसका लागि निर्वाचनको मिति सार्नुपर्ने उनीहरुको मुख्य माग रहेको थियो ।

छलफलमा सरकारका तर्फबाट प्रधानमन्त्रीसहित गृहमन्त्री बालकृष्ण खाँण, प्रमुख सत्तारुढ दल नेपाली कांग्रेसका उपसभापति पूर्णबहादुर खड्का, महान्यायाधिवक्ता खम्मबहादुर खाती, गृहसचिव टेकनारायण पाण्डे तथा नेकपाका तर्फबाट महासचिव चन्द र प्रवक्ता खड्गबहादुर विश्वकर्मा सहभागी थिए ।

नेकपाका नेताहरूले कार्यकर्ता रिहाइ र मुद्दा फिर्तालाई छिटो टुंगोमा पु¥याउन आग्रह गरेका थिए । नेकपासँग सरकारले गरेको तीनबुँदे सहमति कार्यान्वयन गर्न सरकार गम्भीर रहेको प्रधानमन्त्री देउवाले बताएका थिए । नेकपा र तत्कालीन सरकारबीच २०७७ फागुन २० गते तीनबुँदे सहमति भएको थियो ।