कोइरालाको सन्देश,‘ हामी बिचका मतभेद र मनभेदहरु पार्टीको आन्तरिक जीवनको विषय हो’

१ बैशाख, काठमाडौं । नेपाली कांग्रेसका नेता डा. शेखर कोइरालाले कार्यकर्ताहरुको क्रियाशीलतामा मात्र कांग्रेस र लोकतन्त्रको भविष्य सुनिश्चित हुने बताएका छन् ।

उनले नयाँ वर्षको शुभकामना सन्देशमा यो वर्षलाई नेपाली कांग्रेसका कार्यकर्ताले चुनावी वर्षका रूपमा लिनु पर्ने बताएका छन् ।

कोइरालाले कांग्रेसभित्र कुनै विभाजन नरहेको र केन्द्रीय समितिका निर्णयहरुमा सबैको एकमत रहेकाले नयाँ वर्षलाई स्वागत गर्दा हाम्रो सङ्कल्प र अर्जुन दृष्टि कांग्रेसलाई तिनै तहको निर्वाचनमा विजयी बनाउने र नेपाली जनताको मुहारमा खुशी ल्याउने तर्फ केन्द्रित हुनुपर्ने बताएका छन् ।

केन्द्र देखि गाउँसम्म अब विभाजित भएर चुनावमा जाने छुट कांग्रेसमा कसैलाई पनि नभएको भन्दै उनले कांग्रेसका विरोधीहरू बलिया संगठित रहेकाले कांग्रेस एक छ भन्ने सन्देश कांग्रेसको निर्वाचन वर्षको पहिलो नारा हुनुपर्ने उनको भनाई छ ।

यस्तो छ, सामाजिक सञ्जाल फेसबुकमा कोइरालाको सन्देश

प्रिय साथीहरू,

तपाईं हाम्रो घर आँगनमा नयाँ वर्ष २०७९ प्रवेश गर्दैछ । नयाँ वर्षको सुखद उपलक्ष्यमा तपाईँ, तपाईँको परिवार र आफन्तजनमा म शुभकामना व्यक्त गर्दछु ।

नयाँ वर्षसँगै देशमा चुनावी माहौल तात्नेछ । यो वर्षभरि नै हामीलाई विश्राम गर्ने समय हुने छैन । हाम्रो क्रियाशीलतामा मात्र कांग्रेस र लोकतन्त्रको भविष्य सुनिश्चित हुनेछ । नेपाली कांग्रेसका हामी सिपाहीले यो वर्षलाई “चुनावी वर्ष” का रूपमा लिनु पर्नेछ ।

वितेको वर्ष हामी सबैको लागि कष्टकर रह्यो । वैश्यिक स्तरमा फैलिएको कोरोना महामारीले हाम्रो राजनीतिक, सामाजिक र आर्थिक जीवनलाई नकारात्मक प्रभाव पारेको छ ।

कैयन परिवारले आफन्त गुमाएका छन । मैले पनि मेरो अभिभावक (दाजु) गुमाएँ । कैयन परिवारको आर्थिक अवस्था अस्तव्यस्त भएर तिनमा जीवन देखि नै निराशा छाएको मैले देखेको छु । उनीहरूमा नवजीवनको धारा बगाउनु छ ।

नयाँ वर्षलाई स्वागत गर्दा हाम्रो सङ्कल्प र अर्जुन दृष्टि कांग्रेसलाई तिनै तहको निर्वाचनमा विजयी बनाउने र नेपाली जनताको मुहारमा खुशी ल्याउने तर्फ केन्द्रित हुनुपर्नेछ ।

केन्द्र देखि गाउँसम्म अब विभाजित भएर चुनावमा जाने छुट हामी कसैलाई छैन । हाम्रा विरोधीहरू बलिया छन र संगठित पनि । तसर्थ हामी एक हौँ भन्ने सन्देश हाम्रो निर्वाचन वर्षको पहिलो नारा हुनुपर्छ । म तपाईँहरूबाट यही अपेक्षा गर्दछु ।

हामी बिचका मतभेद र मनभेदहरु पार्टीको आन्तरिक जीवनको विषय हो र त्यस विरुद्ध हामी पार्टी भित्रै छलफल, बहस र छिनोफानो गर्दै गरौँला । पार्टीभित्र भएका अन्यायपूर्ण निर्णय, काखा र पाखा गरिने प्रवृत्ति विरुद्ध पनि हामी संघर्ष गरिरहने छौँ ।

उम्मेद्वार तय गर्दा निष्पक्षताको लागि हामी लड्ने छौँ । तर प्रत्येक अनुकूल र प्रतिकुल परिस्थितिमा पनि हामी व्यक्तिगत महत्वकांक्षा र स्वार्थलाई त्यागी एक भएर विरोधीसँग लड्ने छौँ भनी प्रण गर्नु आजको आवश्यकता हो ।

म निर्वाचनको समयमा र पछि पनि तपाईँहरूको घर आँगनमा आएर भेटघाट, छलफल र बहस गर्ने नै छु । तपाईँ हामीलाई इतिहासले फेरी एक पटक कांग्रेसलाई नवजीवन सञ्चार गर्ने गहन जिम्मेवारी सुम्पिएको छ । तसर्थ, स्थानीय निर्वाचनबाटै कांग्रेसको विजयी अभियानको हामी सबै सारथी बनौँ ।

अन्तमा, नयाँ वर्षले तपाईँको व्यक्तिगत जीवन र परिवारमा सुख शान्ति प्राप्त होस भन्दै फेरी एक पटक शुभकामना व्यक्त गर्न चाहन्छु । जय नेपाल ।
डा शेखर कोइराला
२०७९ बैशाख १