गठबन्धन प्रतिउत्पादक छ, तर पार्टीले निर्णय गरेपछि मान्नुपर्छः महामन्त्री थापा

१ बैशाख,काठमाडौं ।  नेपाली कांग्रेसका महामन्त्री गगन थापाले चुनावी तालमेलले लोकतन्त्रलाई लाभ नहुने भएपनि पार्टीले निर्णय गरिसकेकाले यसको विपक्षमा जान नमिल्ने बताएका छन् ।

बिहीबार काठमाडौंमा आयोजित एक कार्यक्रममा उनले स्थानीय तह निर्वाचनमा आफ्नो ठाउँ कसरी बनाउने भन्ने छलफल हुनुपर्नेमा तालमेलको विषयले प्राथमिकता पाएको बताए । तालमेलले कसैलाई पनि राम्रो नगर्ने उनको जिकिर छ ।

थापाले अहिले स्थानीय तालमेलको कुरा भन्दा पनि गठबन्धनको विषयले अनावश्यक चर्चा पाएको बताउँदै संसदीय व्यवस्थामा दलहरूबीच तालमेल भएपनि यसले राजनीतिक संस्कृति विगार्ने भएकाले नेपालको लोकतन्त्रका खतिर राम्राे नभएको बताए ।

‘गठबन्धन तालमेल नेपालको राजनीतिक संस्कृतिको लागि यो हितकर छँदैछैन भन्ने मेरो आफ्नो मत हो । तर, पार्टीको निर्णय मानेको छु ।मान्नुपर्छ ।यो विषयमा बहस गर्नै पर्छ ।’ थपाले भने । उनले चुनावी तालमेलकै सन्दर्भमा संयन्त्रले गरेको सर्कुलरको गलत बुझाइ भएकोसमेत बताए ।

थापाले स्थानीयस्तरमा राजनीतिक दलहरूबीच कुरा मिले मात्रै स्थानीय तह निर्वाचनमा तालमेल हुने भन्दै अवस्था हेरेर तालमेल गर्ने भनी निर्णय गरिएको बताए । तल्लो कमिटीमा दलहरूबीच कुरा नमिले केन्द्रबाट हस्तक्षेप नहुने उनको भनाइ छ । ‘स्थानीयस्तरमा पार्टीबीच कुरा मिले तालमेल हुन्छ । माथिबाट थोपरेर हुँदैन । त्यसलाई कसैले मान्दा पनि मान्दैन,’ थापाले भने ।

महामन्त्री थापाले जिल्लाका कार्यकर्ताले तालमेल गर्दैनौं भन्दा हस्तक्षेप गर्न नुहुने र उनीहरूको कुरालाई सम्मान गर्नुपर्ने बताए । स्थानीय कमिटीले नै कोसँग मिल्ने वा नमिल्ने भन्ने निर्णय गर्न पाउनुपर्ने उनको भनाइ छ ।

‘स्थानीय चुनावमा पनि स्थानीय साथीहरूले म कोसँग मिल्छु या मिल्दिन, मेरो मतदाताले के भन्छ भन्ने कुराको निर्णय गर्न पाएन भने र माथिबाट थोपर्दा सबै बिग्रिन्छ’ उनले भने, ‘तालमेल गर्ने नगर्ने कुरा तलको कमिटीले निर्णय गर्ने हो । माथिबाट कसैले निर्णय गर्न मिल्दैन । त्यो स्थानीय चुनावको मर्मविपरीत हुन्छ ।’