विप्लव समूहका नेता भेटपछि प्रचण्डले भने, ‘एमालेमा रहेका ८० प्रतिशत बन्दी कम्युनिष्टलाई मुक्त गर्नुछ’

१  वैशाख, काठमाडौं ।  नेकपा माओवादी केन्द्रका अध्यक्ष पुष्पकमल दाहाल प्रचण्डले नेकपा एमाले भित्र ८० प्रतिशत नेता इमान्दार रहेपनि उनीहरु नेतृत्वको बन्दी भएकाले मुक्त गर्न आवश्यक भएको बताएका छन् ।

यसअघि प्रचण्डले आफ्नै निवास खुमलटारमा नेत्रविक्रम चन्द विप्लव नेतृत्वको नेपाल कम्युनिष्ट पार्टी (नेकपा) का दुई नेता हेमन्तप्रकाश वली र धर्मेन्द्र बास्तोलालाई भेटेका थिए ।

बिहीबार आफ्नै निवास खुमलटारमा आयोजित माओवादी ध्रुवीकरण तथा एकता कार्यक्रममा उनले एमालेभित्रका इमान्दार नेता कार्यकर्ताको नेतृत्व पनि आफूले गर्ने जिकिर गरे ।

उनले एमालेमा सबै खराब नभएको भन्दै तीन वर्षमा को कस्ता रहेछन् भन्ने कुरा आफुले देखेको र त्यहाँ पनि ८० प्रतिशत भन्दा बढी इमान्दार कम्युनिष्ट रहेको बताए ।

उनले एमाले नेतृत्वले धेरै भ्रम दिएर बन्दी बनाएर राखेको बताउँदै प्रतिक्रियावादी, प्रतिगमनकारी प्रवृत्तिको नेतृत्वका बन्दी भएको र उनीहरुलाई मुक्त गर्नुपर्ने बताए ।

प्रचण्डले एमालेसँग एकीकरण गर्दा ६० प्रतिशत भाग आफूहरुले पाएको भए पार्टी नफुट्ने समेत दावी गरे ।

त्यसअघि प्रचण्डले चन्द नेतृत्वका नेता वाली र वास्तोलालाई भेटेका थिए । चुनावको पक्षमा रहेका विप्लव र खड्गबहादुर विश्वकर्माले प्रधानमन्त्री शेरबहादुर देउवालाई भेटेको भोलिपल्ट उनीहरु प्रचण्डलाई भेटेका हुन ।