खुट्टा गुमाएका रायभरको मुद्धा दर्ता गरी कारवाही गर्न आदेश, सरोजलाई पक्राउ गर्न प्रहरीको आलटाल

१ वैशाख, वीरगञ्ज । अस्पतालको लापरवाहीले खुट्टा गुमाएका पर्साका एक युवा न्यायको लागि ८ महिनादेखि प्रहरी कार्यालय धाउँदाधाउँदा थकित भएका छन् । दोषीलाई कारवाही गर्ने मागको जाहेरी लिएर गत साउनमै प्रहरी कार्यालय पुगेपनि प्रहरीले जाहेरी नलिई फाईल नै फालिदिएपछि उनी थप निरास भए । प्रहरीले जाहेरी लिन नमानेपछि हुलाकबाट पठाए । त्यसलाई पनि प्रहरीले सनाखत गरिदिएन । त्यसपछि उनी थप समस्यामा पर्दै गए ।

विषय हो, पर्साको पर्सागढी नगरपालिका वडा नम्बर ५ पचरुखी बहुअर्वाका धर्मदेव रायभरको । गत साउनको ११ गते उनी बीरगञ्जको रामगढवाका ठग पटेलको घरमा निर्माण सम्बन्धी काम गरिरहँदा पटेलको घरको छत खसेर रायभरको खुट्टामा बजारियो । खुट्टामा गहिरो चोट लागेपछि उनलाई बीरगञ्जको नारायणी अस्पतालमा उपचारका लागि भर्ना गरियो ।

उक्त खुट्टाको नारायणीमै उपचार सम्भव हुँदाहुँदै उनलाई बेहोसीको सुई लगाएर नजिकै रहेको भर्खरै खुलेको सुर्या अस्पतालको कर्मचारीको मिलोमतोमा उनलाई सुर्या अस्पतालमा पुर्याईयो । सुर्यामा चिकित्सक र घरमालिक बीचको मिलोमतोमा घाईते रायभर र उनको अभिभावकको मञ्जुरी बेगर चोट लागेको दाहिने खुट्टा काटियो । खुट्टा काटिएको कुरा रायभर होसमा आएपछि मात्रै थाहा पाए । उनको अभिभावकले पनि अप्रेशन सकिएपछि मात्रै थाहा पाए ।

रायभरको चोटग्रस्त खुट्टामा उपचारका लागि पैसा र समय दुवै धेरै लाग्नसक्ने भएकोले घरमालिकको प्रलोभनमा परी सुर्या अस्पतालका सञ्चालक डाक्टर सरोजकुमार सिंहले उपचारको झन्झटै सकिने गरी खुट्टा काटिदिएको परिवारको आरोप छ । डाक्टरले सल्लाह मात्रै गरिदिएको भए हामी छोराको खुट्टा बचाउन भरतपुर वा काठमाडाैं जान सक्थ्यौँ, रायभरकी आमा ललिता देवीले भनिन् । उनी भन्छिन्, भिख मागेरै भएपनि छोराको उपचार गर्ने थिए । तर डाक्टरले एक वचन नसोधेर घरमालिकको प्रलोभनमा परेर मेरो एउटै साहारा मेरो छोराको खुट्टा काटेर अपांग बनाईदिए ।

नारायणीमा पुर्याउँदा आफु होसमै रहेको र खुट्टा चलिरहेको रायभर बताउँछन् । चोट लागेको थियो तर मैले खुट्टा चलाएर पनि हेरेको हो काट्नै पर्ने अवस्थामा थिएन । मुख्य कुरा हामीसँग सोधिएन । त्यसमा हाम्रो आपत्ति हो, रायभरले भने । अन्यायमा परेको महशुस गरी रायभरले अस्पताल र घरमालिकलाई विपक्षी बनाई न्यायको लागि जिल्ला प्रहरी कार्यालय पर्सामा जाहेर दिन गए ।

पर्सा प्रहरीका तत्कालीन प्रमुख बेलबहादुर पाण्डेको ठाडो निर्देशनमा प्रहरीले जाहेरीको फायल फाल्दियो । जाहेरी नलिएको प्रहरीले अस्पताल सञ्चालकसँगको मिलोमतोमा १ लाख ६० हजार रुपैयाँ लिएर सहमतिमा हस्ताक्षर गर्न मतियार बनेर बारम्बार रायभरलाई दबाब दियो ।

गैरकानुनी काम गरेको अस्पतालसँग पैसा लिने कुरामा रायभर सहमत हुन सकेनन् । प्रहरीले उजुरी लिएर अनुसन्धान गर्न पनि नमानेपछि उनी बाध्य भएर न्यायको लागि अदालत गए । उच्च अदालत जनकपुरको अस्थायी ईजलाश बीरगञ्जले गत मंसिर १० गते प्रहरीलाई मुद्धा दर्ता नगर्नुको कारणबारे जवाफ माग गर्यो ।

प्रहरीले रायभर उजुरी सनाखत गर्न नआएको झुटा विवरण पेश गर्यो । त्यसपछि पुनः यसै चैत महिनाको २३ गते उच्च अदालतका न्यायधीश कृष्णबहादुर थापा र अर्जुनप्रसाद कोईरालाको संयुक्त ईजलाशले रायभरको जाहेर दर्ता गरी अस्पताल सञ्चालक तथा चिकित्सकद्धय डाक्टर सरोजकुमार सिंह, डाक्टर मोनिका यादव सिंह र घर धनी ठग पटेल विरुद्द कारवाहीको प्रकृया अगाडि बढाउन प्रहरीको नाममा आदेश जारी गर्यो ।

उक्त आदेश पछि प्रहरीले जाहेरी सनाखत गरेपनि आरोपित सुर्या अस्पतालका सञ्चालक डाक्टर सरोजकुमार सिंहलाई पक्राउ गरी अनुसन्धान गर्न आलटाल गरिरहेको छ । यस विषयमा पीडितसँगै जिल्ला प्रहरी पुगेको पत्रकारहरुसँग कुरा गर्दै प्रहरी नायव उपरीक्षक ओम प्रकाश खनालले यो दर्ता गर्ने मुद्धै नभएको बताए ।

उनले अदालतको कारण बाध्य भएर दर्ता गर्नुपरे पनि यस विषयमा खासै केही निचोड नआउने भन्दै रायभरलाई थप पीडा भर्ने काम गरे । प्रहरी प्रशासन सबै शक्ति र पहुँच हुनेहरुको लागि मात्रै रहेछ भन्दै राभयर यतिबेला थप विक्षिप्त भएका छन् । घटनाका बखत अस्पतालका सञ्चालक समेत रहेका डा. सिंहले बिरामीको ज्यान बचाउनका लागि खुट्टा काट्नुपर्ने बाध्यता आईपरेको बताएका थिए ।