निर्वाचन पर्यवेक्षणका लागि आयोगमा २० हजारकाे निवेदन

२ वैशाख,काठमाडौं ।  निर्वाचन आयोगले स्थानीय तहको निर्वाचनमा पर्यवेक्षण गर्न इच्छुक विभिन्न संस्थाका २० हजार ४६७ जनाको निवेदन परेको बताएको छ ।

निर्वाचन आयोगका प्रवक्ता शालिग्राम शर्मा पौडेलकाअनुसार विभन्न ६५ संस्थाबाट उक्त संख्यामा पर्यवेक्षकले निवेदन आएको हो ।

आयोगले चैत १३ गते निर्वाचन पर्यवेक्षण गर्न चाहने संस्थाहरूलाई विद्युतीय माध्यम (इमेल)बाट निवेदन दिन १५ दिनको म्याद जारी गरेको थियो । स्थानीय तह निर्वाचन २०७९ को पर्यवेक्षण गर्न चाहने राष्ट्रिय संस्थाका लागि १५ दिनको समय दिइएको थियो ।

पर्यवेक्षण अनुमतिका लागि गत चैत १३ गते सूचना प्रकाशित गरी आवेदन माग गरिएकोमा सो अवधिभित्र ६५ वटा संस्थाबाट विद्युतीय माध्यमद्वारा निवेदन प्राप्त भएको र ती संस्थाबाट प्रस्तावित पर्यवेक्षकको संख्या २० हजार ४६७ रहेकोमा पुरुष ११ हजार ६९४ , महिला ८ हजार ४८२ र अन्य २ सय ९१ जना रहेको आयोगले जनाएको छ ।

आयोगमा परेका निदेवनको अहिले छानविन भइरहेको छ । ती संस्थाका निवेदनमाथि जाँचबुझ गरी यथाशीघ्र पर्यवेक्षण अनुमति सम्बन्धि निर्णय लिइने निर्वाचन आयोगले जनाएको छ ।