माओवादीका पक्षमा चुनावी परिणाम आउने गरी प्रचारमा लाग्न नेताहरुलाई प्रचण्डको निर्देशन

२ वैशाख, काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले स्थानीय तहको निर्वाचनमा माओवादीको पक्षमा परिणाम आउने गरी प्रचारको तयारीमा लाग्न निर्देशन दिएका छन् । उनले नेताहरुलाई चुनावका लागि चाँडो उम्मेदवार चयनमा केन्द्रित हुन पनि निर्देशन दिएका छन् ।

अध्यक्ष प्रचण्ड निवास खुमलटारमा शुक्रबार बिहान बसेको पूर्वस्थायी समिति र प्रदेश इञ्चार्जहरुको विस्तारित बैठकमा उनले उम्मेदवारहरु छिटो चयन गर्न र परिणाम देखिने गरी अगाडि बढ्न निर्देशन दिएका हुन् । उनले सत्ता गठबन्धनका दलहरुबीच तालमेल नभए एमालेसँग तालमेल नगर्ने बरु एक्लै चुनाव लड्नुपर्ने नेताहरुलाई बताएका छन् ।

बैठकले सक्दो छिटो उम्मेदवार चयन गर्नका लागि वातावरण सिर्जना गर्ने निर्णय गर्दै शीर्ष नेतृत्वले गठबन्धनमा रहेका दलहरुका बीचमा छलफल गर्ने र अन्य नेताहरु जिम्मेवारी अनुसार सम्बन्धित पालिकामा उम्मेदवार चयन गर्ने गरी प्रस्तुत हुने निर्णय गरेको छ ।

पाँच दलीय सत्तागठबन्धनले महानगरपालिका, उपमहानगरपालिकामा केन्द्रबाटै उम्मेदवार टुंगो लगाउने तय भएको छ । तर, कुन–कुन पालिकाको नेतृत्व कुन–कुन पार्टीले लिने भनेर भागबण्डा मिलिसकेको छैन । सत्ता गठबन्धनमा चुनावी तालमेलको सैद्दान्तिक सहमति भए पनि अझै भागबन्डा टुंगिन सकेको छैन ।