एमालेले स्थापना दिवस च्यासलमा मनाउने

२ वैशाख, काठमाडौं । नेकपा एमालेले पार्टी स्थापना दिवस च्यासलस्थित नयाँ पार्टी कार्यालयमा मनाउने भएको छ । एमालेले वर्षेनि ९ वैशाखमा पार्टी स्थापना दिवस मनाउँछ । अहिले पार्टी कार्यलय सिंगार्नेदेखि सामान सार्ने र मिलाउने काम भइरहेको छ ।

एमालेले केन्द्रीय कार्यालय थापाथलीबाट च्यासलस्थित तुलसीलाल स्मृति भवनमा सार्दैछ । नयाँ कार्यालयमा अध्यक्ष, वरिष्ठ उपाध्यक्ष, उपाध्यक्षहरु र महासचिवको कार्यकक्ष बनिसकेका छन् ।

गएको वर्ष एमालेको कार्यालय थापाथलीमा सरेको थियो । बल्खुस्थित केन्द्रीय कार्यालय २०७२ को भूकम्पबाट क्षतिग्रस्त भएपछि केही वर्ष एमालेले धुम्बाराहीबाट केन्द्रीय कार्यालय चलाएको थियो ।