मतदान स्थगित गर्दै पोखरा महानगरमा एमालेले गर्यो मेयरका लागि १२ जनाको नाम सिफारिस

२ बैशाख, पोखरा । पोखरा महानगरमा प्रमुख छान्न नेकपा एमाले नगर कमिटीले शुक्रबार तय गरेको आन्तरिक निर्वाचन स्थगित गर्दै १२ जनाको नाम जिल्ला कमिटीमा सिफारिस गरेको छ । तोकिएको भन्दा बढी आकांक्षी भएपछि महानगर प्रमुख र उपप्रमुख छनोट गर्न मतदानबाटै उम्मेदवार छान्ने प्रक्रिया सुरु भएपछि सहमति गर्ने भन्दै स्थगित गरिएको थियो ।

निर्वाचन कार्यतालिका प्रकाशन गरेर मतदानको समय घर्किएपछि एमाले पोखरा महानगर कमिटीले १२ जनाको नाम जिल्ला कमिटीमा सिफारिस गर्ने निर्णय गरेर पठाएको हो । कार्यतालिका अनुसार १२ बजेबाट मतदान गर्ने कार्यक्रम राखिएको थियो । तर, सर्वसम्मती भन्दै पोखरा महानगरको प्रमुखमा आकांक्षी १२ जनाकै नाम जिल्ला कमिटीमा सिफारिस गर्ने निर्णय भएको एमाले पोखरा महानगर कमिटी सचिव जीवन आचार्यले जानकारी दिए ।

महानगर प्रमुखको उम्मेदवार केन्द्रले टुंग्याउने भए पनि एमालेले वैशाख ३० गतेभित्रै उमेदवारका आकांक्षीको नाम सिफारिस गरिसक्न अन्तरपार्टी निर्देशन जारी गरेको थियो । तर, कास्की गृह जिल्ला भएका संगठन विभाग प्रमुख खगराज अधिकारी र एमाले उपमहासचिव पृथ्वीसुब्बा गुरुङ तथा सचिव पद्मा अर्याल पक्षबीचको शक्तिसंघर्षका कारण महानगर कमिटीले तोकिएको मितिमा उम्मेदवार सिफारिस गर्न सकेन । भूगोलको आधारमा देशकै ठूलो र एमालेको बलियो पकड भएको पोखरा महानगरमा यी दुई पक्षबीच टकराब देखिएको छ ।

कम्तीमा एक महिलासहित बढीमा तीनजना उमेदवार सिफारिस गर्नुपर्ने निर्देशन एमालेको छ । सोही निर्देशन अनुसार बिहीबार राति दुवै समूहले आफ्ना उमेदवार टुंग्याएका थिए । सोही अनुरुप शुक्रबार निर्वाचन गर्ने कार्यतालिका थियो । अन्तिममा आएर महानगर कमिटीले आकांक्षी रहेका सबैलाई उपल्लो कमिटीमा सिफारिस गर्ने निर्णय गरेको हो ।

नगरप्रमुखको उम्मेदवार बन्न पार्टीको नगर कमिटीले आकांक्षीबीच निर्वाचन प्रक्रिया सुरु गर्दा १२ जना आकांक्षीले उमेदवारी दर्ता गराएका थिए । उपप्रमुखमा ११ जना उमेदवार थिए । प्रमुखको उम्मेदवारको अन्तिम टुंगो भने एमाले केन्द्रीय कमिटीले लगाउने छ । नगर कमिटीले जिल्ला र प्रदेश कमिटीमा सिफारिस गरेका नामबाट पार्टी केन्द्रले उम्मेदवार टुंगो लगाउनेछ ।