गठबन्धन कायम राख्नु कांग्रेसको बाध्यता हो, तालमेलको अधिकार स्थानीय कमिटीलाई भएकाले अलमलिनु पर्दैनः महामन्त्री थापा

३ बैशाख, काठमाडौं । नेपाली कांग्रेसका महामन्त्री गगनकुमार थापाले एक्लै चुनाव लडेर जित हासिल गर्ने सामथ्र्य भएपनि अहिलेको सत्ता गठबन्धन कायम राख्नु कांग्रेसका लागि बाध्यता भएको बताएका छन् ।

उनले गठबन्धन नगरी निर्वाचनमा जाँदा कम्युनिष्टहरुबीच गठबन्धन बन्ने र त्यो एकतामा समेत परिणनत हुन सक्ने अवस्थालाई रोक्नु कांग्रेसका लागी अपरिहार्य भएको बताएका छन् ।

बुढानीलकण्ठमा आयोजित पार्टीको कार्यक्रमलाई सम्बोधन गर्दै महामन्त्री थापाले तालमेल गर्ने वा नगर्ने भन्ने विषयमा पार्टीको तल्लो समिति स्वतन्त्र रहेकोयक नभएको बताए । उनले स्थानीय तहको आवश्यकता र औचित्यताका आधारमा तालमेल गरेर जाने पार्टीको निर्णय असान्दर्भिक नभएको थापाको भनाई छ ।

अहिले पनि विभिन्न जिल्लामा स्थानीय समितिहरुले तलमेल गर्ने कि नगर्ने भन्ने निर्णय गरिरहेको र त्यसलाई केन्द्रले स्वीकार गरेको बताए । उनले भने, ‘पार्टीको निर्णयबारे कोही अलमलिनु पर्दैन । स्थानीय तहको साथीहरूले तालमेल गर्ने निर्णय गर्न पनि पाउनु हुन्छ, नगर्ने निर्णय गर्न पनि पाउनुहुन्छ । कसैले लाद्न पाउँदैन । केन्द्रले हस्तक्षेप गर्दैन ।’

गठबन्धनको केन्द्रीय संयन्त्रले स्थानीय तहमा आफ्नो अवस्था र आवश्यकता अनुसार तालमेल गर्न सक्ने निर्णय गरेको भन्दै उनले यसको अधिकार तल्लो कमिटीलाई भएको दोहोर्याए ।

थापाले नेपाली कांग्रेस एक्लै चुनाव नलड्नुको कारण अन्य दलहरू गठबन्धन गरेर जाने र एकतासमेत गर्नसक्ने सम्भावना भएकोले त्यसलाई रोक्न पार्टीले यस्तो निर्णय गरेको बताए ।