महानगर र उपमहानगरको सिट बाँडफाँट सोमबार सकिने, काठमाडौं महानगरका ३२ वटै वडा जित्ने कांग्रेसको दावी

४ वैशाख, काठमाडौँ । सत्तारुढ पाँच दलीय गठबन्धनले सोमबार साँझसम्ममा महानगरपालिका र उपमहानगरपालिकामा सिट बाँडफाँटको टुंगो लगाउने सहमति गरेको छ । सहमति नजुटेका महानगर र उपमहानगमा मित्रवत प्रतिस्पर्धा गर्ने विषयमा पनि बैठकमा छलफल भएको छ ।

आइतबार बिहान प्रधानमन्त्रीको सरकारी निवास बालुवाटारमा बसेको गठबन्धनको बैठकमा प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल र नेकपा एकीकृत समाजवादीका अध्यक्ष माधवकुमार नेपाल लगायत शीर्ष नेताहरूबीच सोमबारसम्ममा महानगर र उपमहानगरमा सिट बाँडफाँटको टुंगो लगाउने सहमति भएको हो ।

नेकपा माओवादी केन्द्रका नेता नारायणकाजी श्रेष्ठले सोमबारसम्ममा महानगर र उपमहानगरको उम्मेदवारीबारे टुंगो लाग्ने बताए । भोलि पुनः गठबन्धनको बैठक बस्ने र देशैभरि चुनावी तालमेलेको अवस्थाबारेको प्रतिवेदनमाथि छलफल र समीक्षा गरी अन्तिम निर्णयमा पुग्ने सहमति भएको उनले बताए ।

गठबन्धनको केन्द्रीय संयन्त्रले सोमबारभित्र केन्द्रमा प्रतिवेदन बुझाउन प्रदेश संयन्त्रहरूलाई निर्देशन गरेको छ । अहिले स्थानीय तह, जिल्ला र प्रदेश तहमा रहेका संयन्त्रले गठबन्धनभित्र सिट बाँडफाँटको आधार र मापदण्डमाथि छलफल गरिरहेका छन् ।

यता, सत्तारुढ गठबन्धनलाई काठमाडौं महानगरपालिकामा नै स्थानीय तह चुनावमा तालमेल गर्न सकस हुने देखिएको छ । नेपाली कांग्रेस महानगरपालिका समितिले कुनै हालतमा गठबन्धन गर्न नहुने भनेको छ । कांग्रेसभित्रै पनि मेयर र उपमेयरका विषयमा मत विभाजन देखिएको छ ।

गठबन्धनको प्रमुख घटक कांग्रेसको काठमाडौं महनगर समितिको बैठकमा आइतबार स्थानीय तह चुनाव एक्लै जित्ने अवस्था रहेको आवाज उठेको छ । जमलमा बसेको बैठकमा बोल्ने ३२ वटै वडा सभापति तथा नेताले अहिले काठमाडौं महानगरको कांग्रेस संगठन एक्लै जित्ने गरी बलियो बनेको दाबी गर्दै गठबन्धनमा जान नहुने बताएका छन् ।

बैठकमा उपस्थित वडाका सभापतिले आफू बलियो भएको ठाउँमा तालमेल नगर्ने भन्ने कुरा केन्द्रबाट नै आएको दाबी गर्दै काठमाडौं महानगरपालिकामा एक्लै लड्नुपर्नेमा जोड दिएका थिए ।