कांग्रेससँग सहमति हुन नसक्ने स्थानीय तहको तालमेलबारे जसपा नेता र प्रचण्डबीच छलफल

४ वैशाख, काठमाडौं ।  नेपाली कांग्रेस र सत्ता गठबन्धनमा रहेका अन्य दलहरुबीच सहमति जुट्न नसकेका नगर र पालिकाहरुमा कांग्रेसबाहेक तालमेल गर्ने विषयमा नेकपा माओवादी केन्द्र र जनता समाजवादी पार्टीका अध्यक्षबीच छलफल भएको छ ।

आइतबार सिंहदरवारमा माओवादी केन्द्रका अध्यक्ष पुष्पकमल दाहाल प्रचण्ड, जनता समाजवादी पार्टीका संघीय परिषद् अध्यक्ष डा. बाबुराम भट्टराई र अध्यक्ष उपेन्द्र यादवबीच छलफल भएको हो ।

छलफलमा स्थानीय तहको निर्वाचनमा तालमेलको विषयमा जसपाले विशेष चासो राखेको बताइएको छ । सत्तारूढ गठबन्धनमा आबद्ध दलका शीर्ष नेताहरूबीच बसेको बैठकले सबै स्थानीय तहमा तालमेलबारे सहमति जुटाउन असम्भव देखिएपछि प्रचण्ड र अध्यक्षद्वयबीच छलफल भएको हो ।

स्थानीय निर्वाचनमा जसपालाई माओवादीले निषेध गरेको भन्दै बाबुराम र उपेन्द्रले प्रचण्डसँग गुनासो गरेका थिए । पाँच दलीय चुनावी तालमेलमा माओवादीले निषेध गरेपछि सहज वातावरण बनाउने विषयमा तीन नेताबीच छलफल भएको बताएको छ ।

यदि नेपाली कांग्रेससँग सबै स्थानीय तहमा चुनावी तालमेल हुने स्थिति नभएमा जसपा र माओवादीले एक आपसमा सघाएर जाने वातावरण मिलाउने बारेमा समेत छलफल भएको बुझिएको छ ।

जसपा मधेस प्रदेशसहित लुम्बिनी प्रदेशका तराईका जिल्लामा मात्रै बढी प्रभाव भएका तर अन्य जिल्लामा कमजोर भएकाले त्यसमा माओवादीले निषेध गरेको छ ।