मैले जानेर दुई पैसा पनि भ्रष्टाचार गरेको छैनः सभामुख सापकोटा

४ वैशाख, काठमाडौं ।  प्रतिनिधिसभाका सभामुख अग्निप्रसाद सापकोटाले आफुले अहिले सम्म जानेर दुइए पैसा पनि भ्रष्टाचार नगरेको बताएका छन् । उनले भ्रष्टाचार देशको गम्भीर समस्या भएको भन्दै यसलाई तत्काल नियन्त्रण नगर्ने हो भने मुलुकलाई नै सिध्याइदिने चेतावनी पनि दिएका छन् ।

आइतबारबाट काठमाडौंमा सुरु भएको ‘भ्रष्टाचार विरुद्ध कार्टुन प्रर्दशनी’को उद्घाटन गर्दै सभामुख सापकोटाले भ्रष्टाचारविरुद्ध कारवाही नसोझ्याउने हो भने मुलुकलाई सखाप बनाउने बताए ।

भ्रष्टाचारविरुद्धको अभियानको साथमा आफू सधैं रहने प्रतिबद्धता व्यक्त गर्दै सापकोटाले भ्रष्टाचार बढदै गएकोतर्फ सचेत रहँदै त्यसलाई खवरदारी गर्न ढिलाइ गर्न नहुनेमा जोड दिए ।

उनले भने, ‘मैले जानेर चाहिँ दुई पैसा पनि नाजायज ढंगले लिने गरेको छैन । र भ्रष्टाचार चाहिँ मेरो दृष्टिमा र मलाई लाग्दछ यहाँ यो स्तरकै विद्धानहरु हुनुहुन्छ । त्यो स्तरकै बुद्धिजीविहरु हुनुहुन्छ । भ्रष्टाचार भनेको सामान्य एउटा बजेट हिनामिनको कुरा मात्रै होइन । भ्रष्टाचार भनेको राष्ट्रियतासँग जोडिएको कुरा हो । खबरदारी गरेनौं भने यसविरुद्ध निशाना सोझ्याएनौं भने एक दिन यसले हाम्रो प्यारो मातृभूमिलाई खाइदिन्छ ।’

यस क्रममा सापकोटाले सात वटै प्रदेशमा भ्रष्टाचारविरुद्धको अभियान लैजानु पर्ने बताए । त्यसमा आफ्नो पूर्ण समर्थन रहने उनले बताए । काठमाडौंको बबरमहलस्थित नेपाल आर्ट काउन्सिलमा सुरु भएको कार्टुन प्रर्दशनी तीन दिनसम्म चल्नेछ । सभामुख सापकोटाले भ्रष्टाचार नियन्त्रणका लागि क्षेप्याष्त्र हुनेगरी कार्टुन बनाउन पनि कार्टुनिस्टहरूलाई आग्रह गरे ।