आइपिएल क्रिकेटमा चेन्नईमाथि गुजरातको रोमाञ्चक जित

५ बैशाख एजेन्सी । भारतमा जारी १५ औं सिजनको इण्डियन प्रिमियर लिग आइपिएल क्रिकेट अन्तर्गत चेन्नई सुपर किंग्स सिएसके विरुद्ध गुजरात टाइटन्स ३ विकेटले विजयी भएको छ ।

गएराति सम्पन्न खेलमा चेन्नईले दिएको १७० रनको लक्ष्य गुजरातले १९.५ ओभरमा ७ विकेट गुमाएर पूरा गर्‍यो । उसका लागि डेविड मिलर र राशिद खानले उत्कृष्ट ब्याटिङ गरे । मिलरले ५१ बलमा ६ छक्का र आठ चौकासहित अविजित ९४ रन बनाए । त्यस्तै, राशिदले ३१ बलमा तीन छक्का र दुई चौकासहित ४० रनको आक्रामक पारी खेले ।

डेविड र राशिदले छैटौं विकेटका लागि ३७ बलमा ७० रनको साझेदारी गरे । त्यस्तै, अभिनव मनोहरले १२ र ऋद्धिमान साहले ११ रन जोडे । बाँकी ब्याटरले भने दोहोरो अंकमा समेत रन जोड्न सकेनन् । चेन्नईका लागि ड्वेन ब्रावोले तीन, महेश थीक्क्षणाले दुई, रवीन्द्र जडेजा र मुकेश चौधरीले एकरएक विकेट लिए ।

त्यसअघि पुणेस्थित महाराष्ट्र क्रिकेट स्टेडियममा टस हारेर ब्याटिङको निम्तो पाएको चेन्नईले निर्धारित २० ओभरमा ५ विकेट गुमाएर १६९ रन बनाएको थियो ।