तालमेल नमिलेर सत्ता गठबन्धनमाथि प्रश्न उठाइरहेका बेला पेरिसडाँडामा प्रचण्डको पत्रकार सम्मेलन

५ वैशाख, काठमाडौं । सत्ता गठबन्धनमा रहेका दलहरुबीच महानगर र उपमहानगरमा तालमेलका लागी सहमति जुटाउन कठिन भइरहेको अवस्थामा आगामी निर्वाचनबारे थप जानकारी गराउने भन्दै नेकपा माओवादी केन्द्रले पत्रकार सम्मेलन गर्दैछ ।

पार्टी केन्द्रीय कार्यालय पेरिसडाँडामा सोमबार दिउँसो १ बजे हुने पत्रकार सम्मेलनलाई अध्यक्ष पुष्पकमल दाहाल ‘प्रचण्ड’ले सम्बोधन गर्दैछन् । उनले निर्वाचनबारे दलहरुबीच भइरहेको छलफल, त्यसको निष्कर्ष र पार्टीको आगामी रणनीतिका विषयमा जानकारी दिने बताइएको छ ।

पार्टी केन्द्रीय कार्यालय सचिव श्रीराम ढकालले स्थानीय निर्वाचनमा पार्टी तयारीलगायत विषयमा प्रचण्डले धारणा सार्वजनिक गर्ने जानकारी दिए । उम्मेदवारी दर्ता गर्ने दिन ६ दिन बाँकीरहँदा प्रचण्डले पत्रकार सम्मेलन गर्न लागेका हुन् ।

गठबन्धन दलहरूको आजै महानगर र उपमहानगरमा तालमेल टुङ्गो लगाउन छलफल गरिहेका छन् । त्यसका लागि बैठक चलिरहेको छ ।

गठबन्धनमा रहेका दलहरु अझै पनि आ–आफ्नै दाबीबाट पछि हटेका छैनन् । जसले गर्दा महानगर र उपमहानगरको बाँडफाँट नै टुङ्गो लगाउन मुस्किल देखिएको छ । यस्तो समयमा प्रचण्डले बोलाएको आकस्मिक पत्रकार सम्मेलनलाई अर्थपूर्ण रुपले हेरिएको छ ।