हुम्लामा सत्तारुढ गठबन्धन नहुने

५ बैशाख, हुम्ला । स्थानीय तहको नेतृत्वको भागबन्डामा कुरा नमिलेपछि हुम्लामा सत्तारुढ गठबन्धन नहुने भएको छ ।हुम्लामा स्थानीय तहको नेतृत्व कसले बढी लिने भन्नेमै कुरा अड्किएपछि अब जिल्लामा सत्तारुढ दलहरुले स्वच्छ प्रतिस्पर्धा गर्ने सहमति भएको छ ।

स्रोतका अनुसार सोमबार नेपाली कांग्रेस, नेकपा माओवादी केन्द्र र नेकपा एकीकृत समाजवादीका नेताहरुले छुट्टाछुट्टै तर स्वच्छ प्रतिस्पर्धा गर्ने सहमति गरेका हुन् ।

सातवटा स्थानीय तह रहेको हुम्लामा ०७४ को निर्वाचनमा माओवादीले चार पालिकाको अध्यक्ष, एक उपप्रमुख र १८ वडाध्यक्षसहित एकसय पदमा जितेको थियो ।

कांग्रेसले दुई गाउँपालिका प्रमुख, एक उपप्रमुख ११ वडाध्यक्षसहित ७६ पदमा जित्दा एमालेले एक पालिकाको अध्यक्ष, तीन उपाध्यक्ष र १० वडाध्यक्षसहित ५० पदमा चित्त बुझाएको थियो ।