माओवादीले पाउने सिटबारे खुमलटारमा पुर्वस्थायी कमिटी सदस्यलाई प्रचण्डकाे ब्रिफिङ

६ बैशाख, काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्डले’ अहिले खुमलटारमा नेताहरुलाई गठबन्धन बैठकमा भएका सहमति र असहमतिको ब्रिफिङ गरिरहेका छन् ।

बिहान ११ बजे बालुवाटारमा बोलाइएको बैठक सारेर सत्ता गठबन्धनमा रहेका दलका नेताहरु पार्टीमा आन्तरिक छलफल गरेर पुनः बस्ने सहमति अनुसार उनले पार्टीका नेताहरुलाई जानकारी गराएका हुन् ।

माओवादी केन्द्रका पुर्वस्थायी कमिटी सदस्यहरु उपस्थित बैठक अहिले पनि जारी छ । चुनावी तालमेलबारे छलफल गर्न अध्यक्ष प्रचण्डले नेताहरुलाई बोलाएका हुन् । आज दिउँसो २ बजे गठबन्धनका शीर्ष नेताहरुको बैठक बस्दैछ ।

आजसम्म भएको सत्ता गठबन्धनको बैठकले गरेका निर्णय बारे जानकारी गराउन र नेताहरुको सुझाव लिएर बैठकमा प्रस्तुत हुने प्रचण्डको तयारी छ । आजै गठबन्धनले महानगर र उपमहानगरको सिट बाँडफाँड सक्ने जनाएको छ ।