कांग्रेसलाई सरकारमा ल्याउनु मेरो गल्ती हैन, गठबन्धन तोड्ने षडयन्त्र नगरौँः प्रधानमन्त्री देउवा

६ वैशाख, काठमाडौं । प्रधानमन्त्री तथा नेपाली कांग्रेसका सभापति शेरबहादुर देउवाले चारैतिरबाट सत्तारुढ गठबन्धन तोड्ने षडयन्त्र भइरहेको बताएका छन् । उनले कुनै हालतमा गठबन्धन तोड्न नहुने पक्षमा आफू रहेको धारणा राखेका छन् ।

नेविसंघको स्थापना दिवसका अवसरमा मंगलबार काठमाडौंमा आयोजित कार्यक्रममा देउवाले अहिलेको निर्वाचन प्रणालीअनुसार कुनै पनि दलले बहुमत ल्याउने अवस्था नभएकाले गठबन्धन गर्नैपर्ने बताए । उनले कांग्रेसलाई सरकारमा पुर्याएर आफुले गल्ती नगरेको भन्दै पहिले सरकारको नेतृत्वमा पठाएर अहिले गठबन्धन तोड भन्न नहुने बताए ।

देउवाले भने,‘यो गठबन्धन टुटाउने षडययन्त्र भइरहेको छ । भित्र र बाहीर दुवैतिरबाट । गठबन्धन नभए हाम्रो हालत के हुने थियो र ओलीलाई कसरी हटाउनुप¥यो । यो संविधानअनुसार कुनै पनि एक्लै पार्टीको बहुमत आउने सम्भावना छैन । कसै न कसैसँग त गठबन्धन गर्नुपर्छ । गठबन्धन भन्दाखेरि ’गिभ एन्ड टेक’ त हुन्छ । कांग्रेस ठूलो पार्टी छ हेर्नै पर्छ ।’

स्थानीय तह निर्वाचनमा गठबन्धन गर्न नहुने आवाज पार्टीभित्र उठिरहेका बेला देउवाले गठबन्धन गरेरै कांग्रेसको नेतृत्वमा संघीय र प्रदेशमा सरकार गठन गरेको तथा विभिन्न प्रदेशमा मन्त्री बनाएको कुरामा जोड दिए ।

कांग्रेसका महामन्त्रीद्वय गगनकुमार थापा र विश्वप्रकाश शर्मादेखि महाधिवेशनमा सभापतिमा पराजित शेखर कोइराला पक्ष गठबन्धनको विपक्षमा रहेका बेला देउवाले भने, ’हामी संसदीय चुनावमा हारेको हो । अहिले गठबन्धनले धेरै ठाउँमा हाम्रो सरकार छ । धेरै ठाउँमा मुख्यमन्त्री र मन्त्री छन् । धेरै ठाउँमा हामीले भाग पाएका छौं । के बिगारेँ मैले ? मैले कांग्रेसलाई सरकारमा ल्याउनु गल्ती हो भने मैले गल्ती गरेको भन्नुपर्छ ।’