खुमलटारमा प्रचण्डलाई नेताहरुले भने, ‘महानगर एउटै भएपनि उपमहानगरमा तल नझर्नू’

६ वैशाख, काठमाडौं ।  सत्ता गठबन्धनको बैठक अघि खुमलटारमा बसेको नेकपा माओवादी केन्द्रको बैठकमा नेताहरुले एउटै मात्र महानगरमा चित्त बुझाउनुपर्ने अवस्था रहे पनि उपमहानगरमा भने अडान नछाड्न सुझाव दिएका छन् ।

उनीहरुले कम्तिमा चार उपमहानगरपालिकाको नेतृत्व माओवादीको भागमा आउनुपर्ने दाबी नछोड्न पार्टी अध्यक्ष पुष्पकमल दाहाल प्रचण्डलाई सुझाव दिएका हुन् ।

स्थानीय चुनावबारे छलफल गर्न आज आयोजित केन्द्रीय कार्यालयको विस्तारित बैठकमा नेताहरुले चार उपमहानगरको दाबीमा लचक नहुन भनेका छन् ।

महानगरमा भरतपुर मात्रै दाबी गरिरहेको माओवादी केन्द्रका एक नेताले भने, ‘महानगरमा एउटामा मात्रै चित्त बुझाएर जाने स्थिति सिर्जना भएछ । यसको क्षतिपूर्तिस्वरुप चारवटा उपमहानगरमा जोड दिएर जानुपर्छ भन्ने सुझाव अधिकांश नेताबाट आयो ।’

महानगरमा भरतपुर मात्रै दाबी गरिरहेको माओवादी केन्द्रले चारवटा उपमहानगरमा पनि दाबी गरेको छ । माओवादीले गठबन्धनको बैठकमा जितपुर–सिमरा, घोराही, धरान र हेटौंडा उपमहानगरको प्रमुख आफूले पाउनुपर्ने माग गरेको छ ।

बैठकमा अध्यक्ष पुष्पकमल दाहाल प्रचण्डले अहिलेसम्मको अवस्थाबारे ‘बिफ्रिङ’ गरेका थिए । माओवादी केन्द्रको सोमबार अबेर केन्द्रीय समितिको भर्चुअल बैठक बसेको थियो ।

उक्त बैठकमा पनि प्रचण्डले अहिलेसम्मको अवस्थाबारे जानकारी गराउँदै आफ्नै शक्तिमा भर पर्न निर्देशन दिएको एक केन्द्रीय सदस्यले जानकारी दिए ।