भीरकोटको राजनीतिमा यसरी उदाए यामप्रसाद अधिकारी ‘लक्ष्मण’

७ बैशाख, स्याङ्जा । यही बैशाख ३० गते हुन गैरहेको स्थानीय तहको निर्वाचन नजिकिदै गर्दा अन्य स्थानीय तहमा जस्तै स्याङ्जाको भीरकोटमा पनि चुनावी माहोल तातिएको छ । भीरकोटमा बिशेष गरी नेपाली कांग्रेस र एमालेका नेता तथा कार्यकर्तालाई चुनावी रौनकले छपक्कै छोपेको देख्न सकिन्छ ।

यसपटक कांग्रेसबाट भीरकोट नगरपालिकाको मेयरमा कांग्रेसका नगर सभापति यामप्रसाद अधिकारी (लक्ष्मण)ले उम्मेदवारी घोषणा गरिसकेका छन् । अधिकारी कांग्रेसका बलिया उम्मेदवार हुन् । कांग्रेसको १४औँ महाधिवेशन अन्तर्गत भीरकोटको नगर सभापतिमा विजयी अधिकारी २०७४ को स्थानीय निर्वाचनमा भीरकोट ५ बाट निर्वाचित वडाध्यक्ष समेत हुन् । युवा नेता अधिकारी भीरकोटको लोकप्रिय नेताको रुपमा कार्यकर्ता र जनतामाझ परिचित छन् ।

यसअघि वडाको नेतृत्व सम्हालिसकेका र पार्टीको नगर सभापति समेत बनेका अधिकारीलाई स्याङ्जाका वर्तमान सभापति राजु थापा, गण्डकी प्रदेश सभापति शुक्रराज शर्मा, उपसभापति कल्पना तिवारी, केन्द्रिय उपसभापति धनराज गुरुङ लगायत धेरै नेताहरुकोे समर्थन छ । अधिकारीले भीरकोटमा आफु बलियो रहेको बताईरहे पनि अब भीरकोटको नेतृत्वमा को आउँला भन्ने कौतुहलता धेरैमा रहेको छ । ९ वडा रहेको भीरकोटमा यसपटक २० हजार ७ सय ६९ मादाता रहेका छन् ।

लामो समयदेखि भीरकोटको राजनीतिमा रहेका यामप्रसाद अधिकारी को हुन् र उनी राजनीतिमा कसरी आए भन्ने विषय महत्वपूर्ण बनेको छ ।

को हुन् यामप्रसाद अधिकारी

स्याङ्जा जिल्लाको भीरकोट नगरपालिका वडा नं ५ साविक स्वरेक गाविस वडा नं ५ का स्थायी बासिन्दा अधिकारीको जन्म २०३९ सालमा भएको हो । २ दशकभन्दा लामो समयदेखि कांग्रेसको राजनीतिमा सक्रिय रहेका अधिकारी नेपाली कांग्रेसभित्र इमान्दार र सिद्धान्तमा निष्ठावान नेताको रुपमा परिचित छन् । जिल्लामा खगेन्द्रराज रेग्मी, भोजराज अर्याल र स्व. कमल पंगेनीको अत्यन्तै नजिक रहेर काम गरेका उनी सांगठनिक रुपमा चतुर नेताको रुपमा चिनिन्छन् ।

१० बर्षको बाल्यकालदेखि नै कांग्रेसबाट प्रभावित अधिकारी २०४८ सालको निर्वाचनमा कापीको पन्नामा ४ तारे झण्डा लेराई ४ तारा चारै सिटको नारा लगाएको घटना आज पनि ताजै रहेको बताउँछन् । विगत १ दशकदेखि हुँदा खाँदाको व्यावसाय नै छोडेर उनी सक्रिय राजनीतिमा होमिएका छन् ।

२०६२/०६३ मा देशमा लोकतन्त्र ल्याउन अग्रणी भुमिका खेलेका अधिकारी कांग्रेसको १३ औं महाधिवेशनमा क्षेत्रीय प्रतिनिधि चुनिन सफल भए । त्यससँगै नगर र जिल्लामा उनको राजनीतिक प्रभाव विस्तारै बढ्दै गयो । २०५९ मा नेविसंघको क्याम्पस ईकाइमार्फत राजनीतिमा जोडिएका उनी दर्जनौं सामाजिक संघसंस्थामा संलग्न छन् ।

वालिङ उद्योग वाणिज्य संघको सदस्य, सहकोषाध्यक्ष तथा फर्निचर व्यवसायी संघको जिल्ला अध्यक्ष हुँदै केन्द्रिय सदस्य समेत भएका अधिकारी वालिङ जेसीजका पूर्व अध्यक्ष समेत हुन् । कोभिड महामारीको बेला एम्बुलेन्सले समेत सेवा दिन डराईरहेको अवस्थामा अधिकारीले आफ्नो निजी सवारीमार्फत करिब ७ सय बिरामीलाई निशुल्क सेवा दिएका थिए । परोपकारी भाव र नेतृत्व क्षमता भएकै कारण नगर अधिवेशनले भीरकोट कांग्रेसको नेतृत्व गर्ने जिम्मा उनलाई नै दियो । त्यो सँगै ५ बर्षका लागि अधिकारी सभापतिमा चुनिए ।

२०५६ मा भएको आम निर्वाचनमा नेविसंघमार्फत सक्रिय भुमिका निर्वाह गरेका उनले माओवादी शान्ति प्रकृयामा आईसके पछाडि २०६४ सालमा भएको संविधानसभा निर्वाचनमा र २०७० को संविधानसभा निर्वाचामा स्याङ्जा २ नम्वर क्षेत्रबाट चुनाब लडेका स्व. कमल पंगेनी जिताउ अभियानमा युवा परिचालनको जिम्मेवारी पाए । तत्कालीन अवस्थामा स्याङ्जामा ३ निर्वाचन क्षेत्र रहेको थियो । सो बेला दुई क्षेत्रमा कांग्रेसले जितेको थियो ।

उनी जनताका साना साना काममा पनि चासो दिँदै आफै फिल्डमा पुगेर काम गराउने क्षमता भएका नेताको रुपमा पनि परिचित छन् ।जुनसुकै बेलामा पनि जनता तथा कार्यकर्ताको फोन उठाउने र समस्या सुन्न तत्पर हुने नेताको रुपमा उनलाई भीरकोटे जनताले लिने गरेका छन् । २०७२ सालको भुकम्पमा जेसीजमार्फत तत्काल राहात तथा उद्धारको लागि उनले देखाएको तत्परता र सहयोगको अहिले पनि भीरकोट र वालिङमा बेलाबेलामा चर्चा हुने गरेको छ ।

विभिन्न समयमा भईपरि आउने दुर्घटनामा उद्धार तथा उपचारको लागि उनले खेल्ने गरेको भुमिकाको विषयमा स्याङ्जामा निकै चर्चा हुने गरेको छ । कोरोना महामारीको समयमा बिरामीले सवारी साधन नपाएको अवस्थामा अधिकारीले नै हस्पिटल पु¥याए । कोरोनाको कारण मृत्यू भएकाको आफन्त नहुदाँ आफै दाहसंस्कार पनि गरे । बिरामीहरुले बेड नै नपाएर छट्पटाई रहनु परेको अवस्थामा पनि उनले त्यसको व्यवस्थापन र उपचार गराउनको लागि महत्वपुर्ण भुमिका खेलेका थिए । अधिकारीलाई भीरकोटका अन्य पाटीका नेता तथा कार्यकर्ताहरुले पनि आदर्शको रुपमा लिने गरेको पाईन्छ ।

फर्निचर व्यावसायी संघको संस्थापक अध्यक्ष भएपछि फर्निचर व्यवसायीहरुको धरोहरको रुपमा समेत उनी परिचित छन् । उनले जिल्लामा फर्निचर व्यवसायी संघ स्थापनाको लागि निकै महत्वपुर्ण भुमिका रहेको छ । २०६२/६३ को जनआन्दोलन सफल बनाउनको लागि उनले खेलेको भुमिकाको अहिले पनि सबैतिर प्रशंसा हुने गरेको छ ।

नेपाली कांग्रेस भीरकोटको संगठन निमार्णमा उनले खेलेको भुमिका निकै अतुलनिय छ । कांग्रेसमै लागेको कारण माओवादीले देशमा सशस्त्र युद्ध गर्दै गर्दा उनीहरुको आँखाको तारो समेत बनेका थिए । तर पनि अधिकारी आफ्नो विचार र सिद्धान्तबाट कहिल्यै विचलित भने भएनन् ।