पोेखरा महानगरमा रुख चिह्नबाट लडे मात्रै समाजवादीलाई भोट: कांग्रेस

७ वैशाख, काठमाडौं ।  शीर्ष नेताहरुको भागबण्डामा सत्ता गठबन्धनमा रहेको माधव नेपाल नेतृत्वको नेकपा एकिकृत समाजवादीको भागमा पोखरा महानगर परेपछि कांग्रेस विच्किएको छ भने एमाले आफुलाई जितका लागि सहज भएको निष्कर्षमा छ ।

नेकपा एसको पक्षमा महानगर गएपछि बुधबार विहानै देखि विभिन्न अडकलवाजी र गणीतीय हिसाव किताव पनि सुरु भएको छ । एमाले पक्षधरहरु गएरातीदेखिनै पोखरा महानगरमा फेरी आफ्नै पकड हुनेमा ढुक्क जस्तै बनेका छन् । स्थानीय माहोल र गत निर्वाचनको मत परिणामलाई हेर्दा पनि एमालेका लागि कांग्रेस भन्दा एसको उपस्थिति निकै सहज नै देखिएको छ ।

कास्कीमा कांग्रेस मतदाता नेतृत्वप्रति निकै आक्रोसित छन् । गठबन्धन नगरेरै ६० हजार भन्दा बढी मत कांग्रेसमा झर्ने उनीहरुको अनुमान थियो । स्थानीय बुद्धिजिविहरु पनि कांग्रेसको यो अनुमान स्वभाविक नै भएको बताउँछन् ।

यही परिस्थितिलाई मुल्याँकन गर्दै कांग्रेसका केही नेता र कांग्रेस समर्थक बुद्धिजिविहरुले गठबन्धनबाट नेकपा एसले नै नेतृत्व गर्ने र एमालेसंग प्रतिस्पर्धा गर्ने हो भने कांग्रेसको चुनाव चिह्न रुखबाट नै प्रतिस्पर्धा गर्नुपर्ने सुझाव दिइरहेका छन् ।

यी लगायतका विषयमा छलफल गर्न कास्की कांग्रेसले बुधबार पार्टीमा कार्यालयमा कार्यकर्ता भेला डाकेको छ । कास्की कांग्रेस सचिव भानु ढकालले उक्त भेलाले एकीकृत समाजवादीको जुनसुकै उम्मेदवार उठे पनि रुख चिह्न लिएर चुनाव लडे मात्रै सहयोग गर्ने निर्णय गर्ने जानकारी दिएका छन् ।

उनलेभने, ‘रुख चिह्नबाट लड्न तयार हुने हो भने कार्यान्वयन गरेर अगाडि जान्छौं, त्यसो गर्दा हामीलाई पनि अपनत्व महसुस हुन्छ । होइन भने संघर्षको कार्यक्रम अगाडि बढाउँछौं । गठबन्धनको बैठक बस्न दिन्नौं । चुनावी अभियानलाई पनि अवरोध गर्छौं ।’

यता, संस्थापन पक्षका कांग्रेस नेताहरु भने पोखराको मेयर आफ्नो पार्टीले नपाउँदा चुनावी परिणाममा असर पर्ने आंकलनमा छन् । पार्टीको निर्णय मान्नुपर्ने,गठबन्धनलाई नकार्न नमिल्ने र कांग्रेसले कम्युनिस्टहरुको जस्तो ह्वीप जारी गर्न नसक्ने अवस्थामा छन् ।

०७४ को चुनावमा पोखरा महानगरपालिकामा १ लाख २५ हजार ८५३ मत खसेको थियो । त्यसमध्ये एमालेका मानबहादुर जीसी ६० हजार १ सय १८ मतसहित पोखरा महानगरको प्रमुखमा निर्वाचित भएका थिए । त्यो बेला नेकपा एसको मत पनि यसैमा थियो ।

कांग्रेसका रामजी कुँवर ४६ हजार ४१६ मत ल्याएर पराजित बने । यसको अन्तर १३ हजार माथि छ । ०७४ मा प्रमुखमा माओवादीले कांग्रेसलाई सघाउँदा त्यति मत कुँवरले पाएका हुन । अहिले ३९ हजार ६ सय ४५ मतदाता थपिँदा कुल मतदाताको संख्या दुई लाख सात हजार ७ सय १२ पुगेको छ ।

७५ प्रतिशत मत खस्ने आकलन गर्दा पोखरामा मेयरको उम्मेदवारले चुनाव जित्न ६५ हजार मत ल्याउनुपर्छ । कांग्रेसले आफ्नो ६० हजार मत रहेको दाबी गर्दै आएको छ । समाजवादीले १७ हजार र माओवादीले २७ हजार मतदाता आफ्नो रहेको दावी गरेको छ । तर, कांग्रेसले अनुमान गरेको ६० हजारको आधा पनि मत नेकपा एसको चुनाव चिह्नमा नखस्ने अनुमान धेरैको छ ।