वीरगन्जका मेयर सरावगीले गाडी फिर्ता गरे

७ बैशाख, वीरगञ्ज । वीरगञ्ज महानगरपालिकाका नगरप्रमुख ‘मेयर’ बिजय कुमार सरावगीले महानगरपालिकालाई गाडी फिर्ता गरेका छन् । सरावगीले प्रयोग गर्दै आएको ना १ झ १६९८ नम्बरको गाडी मेयर सरावगीले वीरगञ्ज महानगरपालिकाका प्रमुख प्रशासकिय अधिकृत निश्चलराज पाण्डेलाई साँचो हस्तान्तरण गरेका हुन् ।

चुनावमा सरकारी गाडीको दुरुपयोग नहोस् भनेर आफूले गाडी फिर्ता गरिदिएको सरावगीले बताए । मेयरमा निर्वाचित भएलगत्तै आफूले महानगरपालिकाबाट कुनै सेवा सुविधा नलिने घोषणा गरेका सरावगीले गरेका थिए ।

तर उक्त घोषणाको एक वर्ष नबित्दै सुरक्षाका कारण भन्दै १ करोड ४४ लाख रुपैयाँमा पजेरो गाडी महानगरपालिकाको बजेटबाट खरिद गरी सरावगीले प्रयोग गर्दै आएका थिए ।

यस्तै वीरगञ्ज महानगरपालिकाका ३२ वटै वडाअध्यक्षहरुले पनि मोटरसाइकल बुझाइ सकेको महानगरपालिकाका प्रशासन शाखा प्रमुख रामकुमार कुश्वाहले जानकारी दिए ।