पाँच दलीय गठबन्धनको सहमतिमा किन राखियो ‘मित्रवत प्रतिस्पर्धा’को ढोका खुल्ला ?

७ वैशाख, काठमाडौं । सत्तारुढ दलहरुले वैशाख ३० गते हुने स्थानीय तहको निर्वाचनमा सहमति बन्न नसकेको अवस्थामा पाँच दलीय गठबन्धन भित्र मित्रवत प्रतिस्पर्धा गर्ने जनाएका छन् । यसको अर्थ हो माथिको निर्णय नमान्न पनि पाइने ।

पाँचदलीय गठबन्धनले यसअघि जारी गरेको मापदण्ड, सहमतिको मर्म र भावनाअनुरुप सम्बन्धित समितिहरुको बैठक बसी अविलम्ब सिट बाँडफाँट तथा उम्मेदवारहरुको चयन गर्न दिएको निर्देशनमा ‘सहमति नभए मित्रवत प्रतिस्पर्धा’ गर्ने समझदारी भएको उल्लेख छ ।

अहिले कांग्रेसको भागमा नपरेका महानगरमा कांग्रेसका कार्यकताहरुले विरोध जनाउँदै रुख बाहेक अरुमा मतदान नगर्ने बताइरहेका छन् ।

केहि नेताहरुको बुझाइमा केन्द्रको निर्णय कायन्वयन गराउने अवस्थामा तल्लो तहमा रहेका समितिहरुको प्रयास असफल भएमा अन्तिम अवस्थामा एक्लै लड्नुपर्ने स्थितिलाई सामना गर्ने कण्डीशन राखिएको हो ।

सहमति बन्न नसकेको अवस्थामा पाँच दलीय गठबन्धन भित्रै मित्रवत् प्रतिस्पर्धा गर्न सकिने विषयले तलका निकायमा अन्योलता पनि थपिदिएको छ । यो मौका पाएको अवस्थामा कांग्रेसभित्रै ठ”लो समस्या आउने विश्लेषकहरु बताउँछन् ।

पाँच दलले बुधबार ६ वटा महानगरपालिका र ११ वटा उप–महानगरपालिकामा भागबण्डा मिलाई जारी गरेको विज्ञप्तीमा उक्त कुरा उल्लेख गरिएको छ ।

नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), जनता समाजवादी पार्टी र राष्ट्रिय जनमोर्चाले आज ६ वटा महानगरपालिका र ११ वटा उप–महानगरपालिकाको भागबण्डा मिलाएका छन् ।