कांग्रेस र माओवादीसँग पनि तालमेल हुन सक्ने एमाले सचिवालय बैठकको निष्कर्ष

८ वैशाख, काठमाडौं ।  नेकपा एमालेको केन्द्रीय सचिवालय बैठकले वैशाख ३० को निर्वाचनमा कतिपय स्थानीय तहमा माओवादी र कांग्रेससँग पनि तालमेल हुन सक्ने निष्कर्ष निकालेको छ । अध्यक्ष केपी ओलीको निजी निवास बालकोटमा बसेको केन्द्रीय सचिवालयको बैठकले यस्तो निष्कर्ष निकालेको हो ।

आसन्न स्थानीय तह निर्वाचनको उम्मेदवारी छनोट, निर्वाचनको तयारीलगायतका विषयमा छलफल गर्न बैठक बसेको हो । सत्तारुढ पाँच दलीय गठबन्धन संयुक्त उम्मेदवार उठाएर निर्वाचनमा जाने भएपछि पार्टीको रणनीतिका विषयमाथि बैठकमा छलफल भएको हो ।

एमाले प्रचार विभाग प्रमुख पृथ्वीसुब्बा गुरुङले सचिवालय बैठकपछि यस्तो जानकारी गराएका हुन् । एमालेले राप्रपा नेपाल, लोकतान्त्रिक समाजवादी पार्टी, परिवार दलसहितका पार्टीसँग चुनावी तालमेल गर्ने निर्णय गरिसकेको छ ।

‘कतिपय स्थानीय तहमा कांग्रेस र माओवादीसँग पनि तालमेल हुन सक्छ,’ उनले भने, ‘पोखरा महानगरको हकमा प्रदेश सभा सदस्यलाई अघि सार्दैनौँ त्यहाँ जुनसुकै बेला सरकार ढल्न सक्ने अवस्थामा छ ।’ गण्डकी सरकार जुनसुकै बेला ढल्न सक्ने भएकाले प्रदेश सभा सदस्यलाई उमेदवार नबनाउने निर्णय भएको पनि उनले बताए ।