मनोनयन दर्ता गर्न दुई दिन बाँकी, उम्मेदवारको टुंगो लगाउन दलहरुलाई सकस

९ वैशाख, काठमाडौं । निर्वाचन आयोगले दलहरुलाई उम्मेदवारको मनोनयन दर्ताका लागि ११ र १२ गतेको समय दिएको छ । दुई दिन बाँकी रहँदा पनि सत्तारुढ गठबन्धन र प्रमुख प्रतिपक्ष एमालेसहितका दलले उम्मेद्वारको टुंगो लगाउन सकेका छैन ।

निर्वाचन आयोगका अनुसार ११ वैशाखदेखि सुरु हुने मनोनयन दर्ता हुनेछ । तर, सत्तारुढ पाँच दलीय गठबन्धनले महानगर र उपमहानगरपालिकाको भागवण्डा गरे पनि उम्मेद्वारको टुंगो लगाउन अझै सकेका छैनन् भने प्रतिपक्ष एमाले १० वैशाख उम्मेद्वार टुंग्याउने घोषणा गरेको छ ।

नेपाली कांग्रेसले मुख्यतः महानगर र उपमहानगरमा उम्मेद्वार चयनका लागि केन्द्रीय कार्यसम्पादन समितिको बैठक बोलाएको छ भने एमालेले शनिबारको बैठकबाट निर्णय लिने भएको छ । कांग्रेसभित्र पनि आन्तरिक विवाद मिलेको छैन् ।

नेकपा माओवादी केन्द्रले भरतपुर महानगरपालिकाका लागि रेणु दाहाललाई दोहो¥याउने जनाइरहेका बेला नेकपा (एकीकृत समाजवादी), जनता समाजवादी पार्टीले भने अझै निर्णय लिन सकेका छैनन् ।

हाललाई आन्तरिक छलफलमा रहेको जनाउँदै ११ वैशाखभित्रै निर्णय लिने गरी राजनीतिक दललाई दबाब बढ्दै गएको छ । शुक्रबार र शनिबारसम्ममा दलहरुले उम्मेदवार चयन गरिसक्नुपर्ने छ ।