कम्युनिष्ट एकतामा जोड दिँदै प्रचण्डले भने, ‘एमालेभित्र सबै ओली जस्ता खराब छैनन्, राम्रा कम्युनिस्ट पनि छन्’

९ वैशाख, काठमाडौं ।  नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले कम्युनिष्ट एकता अहिलेको अपरिहार्यता भएको बताएका छन् । उनले अगाडी बढीसकेको कम्युनिष्ट एकता समेत खराब व्यक्तिका कारण भत्किएको दावी गरेका छन् ।

अध्यक्ष प्रचण्डले नेकपा एमाले पार्टी भित्र सबै केपी शर्मा ओली जस्ता खराब मात्रै नभएर राम्रा कम्युनिस्ट पनि रहेको बताउँदै एमाले र माओवादीको एकता ओलीकै कारण टुटेको धारणा राखेका छन् ।

पेरिसडाँडामा आयोजित नेपाल कम्युनिस्ट पार्टीको स्थापना दिवसका अवसरमा आयोजित कार्यक्रमलाई सम्बोधन गर्दै उनले एमाले भन्दैमा सबै खराब नजरले हेर्न नमिल्ने बताए ।

प्रचण्डले भने,‘नेकपा एमालेका कामरेडलाई म स्मरण गर्न चाहन्छु । एमालेका नेता÷कार्यकर्ताले विश्वास र भरोस गरेका थिए । एमाले भन्दैमा सबै खराब छैनन् । त्यहाँ पनि राम्रा कम्युनिस्ट छन् । तर, ओलीका कारण अलग हुनुपर्यो ।’

एमालेको नेतृत्वमा गलत व्यक्ति बसेका कारण धेरैलाई एमाले पार्टी नै खराब हो भन्ने परेको उनले बताए । एमालेको नेतृत्वमा गलत व्यक्ति पर्दा त्यहाँ रहेका इमान्दरा कम्युनिस्टलाई फुत्किन गाह्रो भइरहेको प्रचण्डको भनाई छ ।

‘आज पार्टी स्थापना दिवसको अवसरमा सम्पूर्ण एमाले भित्रका ती इमान्दार कम्युन्सिट जुन साच्चै बाम गठबन्धनको पक्षमा अहिले हुनुहुन्छ, कम्युनिस्टहरुको एकता आवश्यक छ भन्ने ठान्नुहुन्छ उहाँहरुलाई गलत प्रवृतिकाविरुद्ध संघर्ष गर्न प्रेरणा मिलोस्,’ अध्यक्ष प्रचण्डले भने ।