पत्रकार सम्मेलनमार्फत जनकपुरका असन्तुष्ट कांग्रेस नेताहरुले सामूहिक राजीनामा दिँदै

९ वैशाख, जनकपुर । गठबन्धनका कारण जनकपुर उपमहानगरपालिका जनता समाजवादी पार्टीको भागमा गएकोभन्दै कांग्रेस जनकपुर उपमहानगर सभापतिसहित केही पदाधीकारी र सदस्यहरुले सामूहिक राजीनामा दिने भएका छन् ।

उपमहानगर सभापति मनोज साहलगायत असन्तुष्ट नेता कार्यकर्ताहरुले पार्टीबाट राजीनामा दिन लागेका हुन् । सभापति साहले वडा नम्बर १५ का वडाअध्यक्ष, सम्पूर्ण पदाधीकारी, टोल समिति र सम्पूर्ण नेता कार्यकर्ताले राजीनामा दिन लागेको जानकारी दिए । उनले दिउँसो २ बजे पत्रकार सम्मेलन गरेर राजीनामा दिन लागेका हुन् ।

केन्द्रले गठबन्धनको नाममा जनकपुरमा कांग्रेस सिध्याउन लागिपरेको र जसपलाई पार्टी वुझाउन लागिपरेको उनको आरोप छ । यता, धनुषा जिल्ला सभापति योगेन्द्र पंजियारले पनि नगर सभापतिसहित असन्तुष्टहरुले राजीनामा दिने तयारी गरेको आफूले थाहा पाएको बताए ।

पंजियारले केन्द्रले आफूहरुको मनोभावना विपरित जनकपुरमा गठबन्धन भएको पनि बताउँदै आफूहरुलाई मधेसवादी दलहरुले शत्रु देख्ने गरेकोभन्दै सिङ्गो प्रदेशनै मधेसवादी दलहरुलाई सभापति देउवाले वुझाउने षडयन्त्र भएको बताए ।

सभापति पंजियारले नगर समितिले राजीनामा दिएर स्वतन्त्र उमेदवारी दिने तयारी गरिरहेको जानकारी दिए । यसबारे केन्द्रले भने कुनै प्रतित्रिया जनाएको छैन । कांग्रेसका मधेश केन्द्रित नेताहरुले पनि गठबन्धनप्रति असहमति राख्दै आएका छन् ।