भरतपुरमा रुख चिह्नबाट चुनाव लड्न रेनुलाई सुझाव, असन्तुष्ट पक्षले सभापतिको कार्यकक्षमा लगाए ताला

९ वैशाख, चितवन ।  चितवन कांग्रेसका असन्तुष्ट नेताहरुले रेनु दाहालले भरतपुरको मेयरमा रुख चिह्नबाट चुनाव लडेमात्रै भोट दिने विषयमा छलफल गर्न सकिने बताएका छन् ।

उनीहरुले रेनुले कांग्रेसको भोट पाउन रुख चिह्न लिएर लड्नुपर्ने नत्र भोट नपाउने बताएका छन् ।

पूर्व सांसद जगन्नाथ पौडेलले रेनु दाहालले रुख चिह्नबाट चुनाव लड्ने हो भने छलफल गर्न सकिन नत्र माओवादीको चिह्नमा कांग्रेसले भोट नहाल्ने बताए ।

२०७४ को स्थानीय तहको निर्वाचनमा कांग्रेसले भरतपुरको मेयरमा रेनु दाहाललाई सहयोग गरेको भन्दै उनले यसपटक केन्द्रको निर्णय कार्यन्वयन नहुने बताए ।

भरतपुरको मेयरमा माओवादी केन्द्र र उपमेयरमा कांग्रेसबाट उमेदवार उठाउने गरी सत्ता गठबन्धनमा निर्णय भएपछि जिल्ला तहका नेता कार्यकर्ताहरु रुष्ट बनेका छन् ।

मेयरको उमेदवार नेकपा माओवादी केन्द्रलाई छाडेकामा असन्तुष्टि जनाउँदै चितवन कांग्रेसका नेता कार्यकर्ताले सभापतिको कार्यकक्षमा तालाबन्दी समेत गरेका छन् ।

असन्तुष्ट पक्षले आज साँझ जिल्ला सभापति राजेश्वर खनालको कार्यकक्षमा तालाबन्दी गरेका हुन् । यसअघि जिल्ला सभापति पनि महानगरको मेयर नछाड्ने पक्षमा थिए । गठबन्धनको निर्णय भएपछि खनालले केन्द्रीय परिपत्र विपरित गतिविधि नगर्न नेता कार्यकर्तालाई आग्रह गरका थिए ।

त्यसपछि झनै रुष्ट बनेका कांग्रेस कन्द्रीय सदस्य टेकप्रसाद गुरुङ, दिनेश कोइराला, पूर्व सांसद जगन्नाथ पौडेललगायतका नेताहरुले सभापति खनालको कार्यकक्षमा तालाबन्दी गरेका हुन् ।

जिल्ला पार्टी कार्यालयमा भएको भेला पश्चात उनीहरुले तालाबन्दी गरेका हुन् । जिल्ला सभापतिको कार्यकक्षमा तालाबन्दी गर्दा कांग्रेस महासमिति सदस्य मिना खरेल, जिल्ला सह–सचिव गोपाल दराईलगायतका नेता कार्यकर्ताको उपस्थिती थियो ।

भरतपुरको मेयरमा गठबन्धनका तर्फबाट माओवादीकी रेनु दाहालले पुनः उमेदवारी दिने भएकी छन् । त्यसका लागि उनले आजै मेयरको पदबाट राजीनामा समेत दिइसकेकी छन् । उनले उपमेयर पार्वती शाह ठकुरीसमक्ष राजीनामा दिएकी हुन् ।