जिल्लाको तालमेलमा समस्या आएपछि गठबन्धनका शीर्ष नेताहरु छलफलमा

१० वैशाख, काठमाडौं । जिल्लाको तालमेलमा समस्या देखिएपछि पाँच दलका शीर्ष नेताहरु गठबन्धनको बैठकमा जुटेका छन् । स्थानीय तह निर्वाचनमा देशभरको चुनावी तालमेलबारे छलफल गर्न सत्तारुढ गठबन्धनको बैठक बसिरहेको छ ।

केन्द्रबाटै महानगरपालिका र उपमहानगरपालिकाको तालमेलबारे टुंगो लगाए पनि विभिन्न जिल्लामा देखिएको समस्याबारे छलफल गर्न नेताहरू छलफलमा जुटेका हुन् ।

केहीबेर अघिदेखि प्रधानमन्त्रीको सरकारी निवास बालुवाटारमा गठबन्धनका शीर्ष नेताहरूको बैठक बसेको प्रधानमन्त्री शेरबहादुर देउवाको सचिवालयले जनाएको छ ।

जिल्लामा गठबन्धन दलहरूले गठबन्धन नगर्ने भन्ने निर्णय गर्न थालेपछि नेताहरूले त्यस्तो हकमा केन्द्रबाटै निर्णय गर्ने वा स्थानीय निर्णयलाई प्राथमिकता दिने भन्नेबारे दलहरूबीच मतभेद देखिएको छ ।

नेकपा एकीकृत समाजवादीले केन्द्रबाटै विवाद भएका जिल्लामा गठबन्धन गर्नेबारे निर्णय गर्नुपर्ने माग गरेको छ ।