नेपालगन्ज उपमहानगरमा माओवादीले छाड्यो गठबन्धन, मित्रवत प्रतिस्पर्धा गर्ने

१० वैशाख, नेपालगन्ज । नेपालगन्ज उपमहानगरपालिकामा नेकपा माओवादी केन्द्रले एक्लै प्रतिस्पर्धा गर्ने भन्दै सत्ता गठबन्धनबाट बाहिरिएको छ ।

चुनावी भागबन्डाका कारण माओवादी केन्द्रले नेपालगन्जमा गठबन्धनबाट बाहिरिने निर्णय गरेको हो । नेपालगन्जमा शनिबार पत्रकार सम्मेलनमार्फत यसको औपचारिक घोषणा गरिएको हो ।

पत्रकार सम्मेलनमा माओवादीले २०७४ को स्थानीय तह निर्वाचनामा पाएको मतपरिणम र गठबन्धन दलको हिसाबमा नमिलेको बताएको छ ।

गएको निर्वाचनमा माओवादी पार्टी दोस्रो स्थानमा हुँदा पनि सम्मानजनक अवसर नदिइएको माओवादीका नेताहरुको भनाई छ ।

माओवादीका नगर अध्यक्ष रतन शाहीले केन्द्रीय गठबन्धनको मूलमर्मविपरीत नेपालगंज उपमहानगर पालिकाभित्र रहेका गठबन्धन सम्बद्ध दलहरु नेपाली कांग्रेस, जनता समाजवादी पार्टी गएको बताए ।

उक्त दलहरुले गठबन्धनको मूल स्परिटविपरीत वडाहरुमा एक्लाएक्लै चुनावी प्रतिस्पर्धामा जाने भनिसकेपछि नेपालगंज उपमहानगरपालिकामा गठबन्धनको औचित्य समाप्त भएको उनले बताए ।

नगर अध्यक्ष रतन शाहीले भने,‘अपमानित भएर बस्न सक्दैनौं । हामीले मेयर, उपमेयर नभए पनि १५ वडा मागेका थियौं । त्यो माग पनि पूरा गरिएन । त्यसैले उपमहानगरको सन्दर्भमा हामी एक्लै लड्छौं ।’ अध्यक्ष शाहीले माओवादी केन्द्र वैशाख ३० गते हुने स्थानीय तह निर्वाचनमा प्रमुख, उपप्रमुखसहित २३ वटै वडामा प्रतिस्पर्धा गर्ने घोषणा गरे ।