उम्मेदवार टुंग्याउन कांग्रेस बैठक बस्दै,विराटनगर, ललितपुर र पोखरामा तीन नेताको अडान यथावत

११ वैशाख, काठमाडौं । नेपाली कांग्रेसको केन्द्रीय कार्यसम्पादन समितिको बैठक बस्दैछ । उम्मेदवारहरुको अन्तिम टुंगो लगाउन आइतबार बिहान नौ बजे पार्टी केन्द्रीय कार्यालय सानेपामा बैठक बस्ने भएको हो ।

आइतबार र सोमबार उम्मेदवारहरुको मनोनयन दर्ताको कार्यक्रम छ । त्यसैले आन्तरिक विवाद मिलाएर उम्मेदवार छिटो टुंगो लगाउनुपर्ने दबावमा नेपाली कांग्रेस परेको छ ।

उम्मेदवार टुग्याउन विराटनगर, ललितपुर र पोखरामा सभापति शेरबहादुर देउवा, नेताहरु डा.शेखर कोइराला र कृष्णप्रसाद सिटौलाबीच सहमति हुन नसकिरहेको बताइएको छ ।

विराटनगर महानगरपालिकाको मेयर उम्मेदवारमा कुरा नमिलेपछि शनिबारको शीर्ष नेताहरुको बैठक निष्कर्षविहीन भएको थियो ।

मेयर उम्मेदवार टुंगो लगाउने प्रयासमा प्रधानमन्त्री निवास बालुवाटारमा कांग्रेसका शीर्ष नेताहरुको बैठक बसेको थियो । तर टुंगोमा पुग्न नसकेपछि आइतबार बिहान फेरि यो विषयमा छलफललाई जारी राख्ने भन्दै नेताहरुले बालुवाटारको बैठक स्थगित गरेका थिए ।

विराटनगर महानगरपालिकाको मेयरमा भीम पराजुलीलाई नै दोहोर्याउने कि शेखर कोइरालाले प्रस्ताव गरेका नागेश कोइरालालाई टिकट दिने भन्नेमा कांग्रेसभित्र विवाद छ ।

बैठकमा शेखरसहित नेता विमलेन्द्र निधि लगायतले काठमाडौंको जस्तै अवस्था विराटनगरमा पनि रहेको भन्दै शेखर कोइरालाले प्रस्ताव गरेको नागेशलाई मेयरको टिकट दिनुपर्ने बताएका थिए । तर यसमा कृष्ण सिटौलाले असहमति जनाउँदै पराजुलीलाई नै मेयरमा दोहोर्याउनुपर्ने अडान राखेका थिए ।
यसैगरी भरतपुर महानगरपालिकाको उपमेयरको उम्मेदवार महानगर सभापति चित्रसेन अधिकारीलाई बनाउन सभापति देउवाले चाहेका छन् । तर रामचन्द्र पौडेल भने सूर्यकान्त घिमिरेलाई टिकट दिनुपर्ने पक्षमा छन् ।

पोखराको उपमेयरमा पनि नेताहरु एकमत हुन सकेनन् । रामचन्द्र पौडेल र शेखर कोइराला कोपिला रानाभाटको पक्षमा छन् तर देउवा सुरेन्द्र विजुक्छेको पक्षमा छन् ।

विजेक्छे नेपाली कांग्रेस पोखराको नगर सभापति हुन् । ललितपुरमा पनि चिरीबाबु महर्जनलाई नै दोहोर्याउने कि नयाँ उम्मेदवार बनाउने भन्नेमा कांग्रेसभित्र बहस भइरहेको छ ।