एमालेसहित गठबन्धनका दलहरुले उपत्यका र अन्य केही स्थानको उम्मेदवारी दर्ता भोली गर्ने

११ वैशाख, काठमाडौं । स्थानीय तहको निर्वाचनमा उम्मेदवार चयनमा सहमति जुटाउन सकस भएपछि ठुला राजनीतिक दलहरूले काठमाडौं उपत्यका र बाहिरमा केही पालिकाहरुमा शोमबार मात्रै उम्मेदवारको मनोनयन दर्ता गराउने भएका छन् ।

नेपाली कांग्रेसले आज अबेरसम्ममा उम्मेदवारहरुको टुंगो लगाउने जनाएको छ भने नेकपा एमालेले आजै उम्मेदवारहरुको नाम टुंग्याउने जनाएको छ । गठबन्धनमा रहेका दलहरु अझै सहमति जुटाउने प्रयासमा रहेका छन् ।

नेकपा एमाले र सत्ता गठबन्धनमा रहेका दलका नेताहरूले उपत्यकामा उम्मेदवारी दर्ता भोलिमात्रै गर्ने जनाएका हुन् । उपत्यकाका काठमाडौँ, ललितपुर र भक्तपुर जिल्लाका सबै स्थानीय तहहरूमा उम्मेदवार तय भैनसकेकाले सोमबारमात्रै उम्मेदवारी दर्ता गर्ने नेकपा एमाले नेताहरुले बताएका छन् ।

त्यस्तै सत्तारुढ गठबन्धन दलले पनि देशका अधिकांश स्थानमा भोलि नै उम्मेदवारी दर्ता गर्ने तयारी गरेका छन् । सत्तारुढ दलका नेता जीवनराम श्रेष्ठले अधिकांश स्थानमा गठबन्धनका साझा उम्मेदवारको उम्मेदवारी सोमबार मात्रै दर्ता हुने बताए ।

आइतबार दिउँसो बस्ने गठबन्धनको बैठकमा देशभरिको तालमेलको अवस्था विश्लेषण गरेर उम्मेदवार तय गर्ने र उम्मेदवारी दिने गठबन्धनको तयारी छ । यता विवेकशील साझा लगायतका दलले भने आइतबार नै उम्मेदवारी दिने बताएका छन् । अन्य साना दलहरुले पनि आज उम्मेदवारी दर्ता गराउँदैछन्