आजदेखि ठेकेदारहरुद्वारा काम बन्द, ३५ सय आयोजनाको निर्माण रोकियो

११ वैशाख, काठमाडौं । निर्माण समाग्रीको मुल्यबृद्धि लगायतका माग राखेर निर्माण व्यवसायीहरुले देशभरीका निर्माणका काम ठप्प पारेका छन् । नेपाल निर्माण व्यवसायी महासंघका अनुसार मुल्यवृद्धिका कारण काम गर्न नसकिने अवस्था आएपछि अनिश्चित कालसम्म ‘कन्सट्रक्सन होलिडे’ गरिएको हो ।

व्यवसायीले काम रोक्दा एकैपटक करिब ३ हजार ५ सयबढी निर्माणको काम भइरहेका साइटहरु बन्द भएका छन् । अत्यावश्यक ठाउँको निर्माण कार्य भने नरोकिने जनाइएको छ ।

महासंघले पेट्रोलियम पदार्थ, फलामजन्य निर्माण सामग्रीहरु छड, ग्याबिन तार, पाता, आइरन ब्लेड लगायतका विभिन्न निर्माण सामग्रीहरुको अप्रत्यासित रुपमा अत्यधिक मूल्य वृद्धि भएकाले पुल निर्माण, सडक कालोपत्रे, नदी नियन्त्रणबाहेकका ३५ सय आयोजनाहरुमा काम बन्द भएको जनाएको छ ।

२०६५ सालमा पनि मूल्य समायोजन मार्गदर्शन नं.–१ जारी गरी निर्माण कार्य सुचारु गरेको नजिर भएको र सोही नजिर अनुसार यसपटक पनि मूल्य समायोजन मार्गदर्शन नं–२ जारी गर्न सरकारसंग व्यवसायीको माग छ । सरकारले माग सम्बोधन नगरेसम्म काम अगाडी नबढाउने महासंघले जनाएको छ ।

व्यवसायीले वृद्धि भएको मूल्यको क्षतिपूर्ति उठ्ने गरी एकमुष्ठ रुपमा ठेक्काहरुको मूल्य समायोजन गर्नुपर्ने माग गर्दै निर्माण सामग्रीहरुमा भएको अत्यधिक मूल्य वृद्धिको सम्बोधन नभएसम्म वा मूल्य वृद्धि नियन्त्रण भएर सामान्य अवस्था नभएसम्मको अवधिलाई ‘कन्स्ट्रक्सन होलिडे’ कायम रहेने बताएका छन् ।